Терроризму экстремизм, шиддат гирифтани манфиатхоҳии абарқудратҳо ва густариши гароиши ҷавонон ба гурӯҳу равияҳои ифротӣ аз масъалаҳое буданд, ки иштирокчиёни конференсияи ҷумҳуриявии илмию амалӣ дар мавзӯи “терроризм: таҳдиду хатарҳо, корҳои тарғиботию ташвиқотӣ дар шароити паёмадҳои сиёсию идеологӣ дар байни ҷавонони Қувваҳои Мусаллаҳи Ҷумҳурии Тоҷикистон”, ки дар Донишкадаи ҳарбии Вазорати мудофиа доир гардид, байни ҳам мавриди муҳокима қарор доданд.
Иштирокчиёни конфронс ҳар яке зимни баромади худ таъкид карданд, ки дар шароити паёмадҳои сиёсию идеологӣ ва таҳдиду хатарҳо ба амнияту суботи кишварҳо, аҳли зиё ва дигар қишри фаъоли ҷомеи моро зарур аст, ки ба хотири тарбияи дурусти насли наврасу ҷавонон аз тамоми роҳу воситаҳои таъсиррасон кор баранд. Зеро, ҷавонон қувваи бузурганд ва бузургтарин масъулият, яъне ҳифзу ҳимояи Ватан бар зимаи онҳо вогузор шудааст.
Вобаста ба пешбурдани корҳои тарғиботию ташвиқотӣ дар байни ҷавонони Қувваҳои Мусаллаҳи Ҷумҳурии Тоҷикистон дар рафти конференесия зикр гардид, ки имрӯз мақомотҳои марбутаи давлатӣ ин вазифаро дар мавриди аввал иҷро намуда, пайваста чорабиниву машваратҳои гуногуни кориро роҳандозӣ менамоянд, ки албатта мақсад аз он тарбияи сарбозони ҷавон дар рӯҳияи эҳтиром ба якдигар, садоқат ба Савганди ҳарбӣ ва хизмати шоиста ба халқу Ватан мебошад.
Дар толори Раёсати Қӯшунҳои зудамали Қувваҳои Мусаллаҳ мамлакат низ вобаста ба татбиқи амалии стратегияву барномаҳои давлатӣ, аз ҷумла Стратегияи миллии муқовимат бо экстремизм ва терроризм дар Ҷумҳурии Тоҷкистон барои солҳои 2021-2025 ва Стратегияи давлатии муқовимат бо коррупсия дар Ҷумҳурии Тоҷикистон барои давраи то соли 2030, бо иштироки намояндагони бахшу соҳаҳои гуногун чорабинӣ доир гардид.
Зимни вохӯрӣ бо ҳайати раёсати ин навъи қӯшун масъулини мақомоти дахлдор моҳияти қонунҳои ҷорӣ доир ба фаъолияти сохторҳои низомӣ ва моддаҳои алоҳидаи Кодекси ҷиноятии Ҷумҳурии Тоҷикистон вобаста ба иштироки шаҳрвандон дар низоъҳои мусаллаҳонаи хориҷиро шарҳу тавзеҳ дода, аз ҷазоҳои муқарраршуда нисбат ба чунин ашхос ёдовар шуданд.
Дар ҷараён вобаста ба мушкилот ва масъалаҳои марбут ба амалҳои ришваситонӣ миёни иштирокчиён муҳокимаву сӯҳбатҳои ошкоро сурат гирифта, афсарон фикру андешаҳои худро доир ба омилҳои пайдоиш, содиршавӣ ва пешгирии амалҳои марбут ба коррупсия пешниҳод намуданд.
Дар маҷмӯъ метавон гуфт, ки маҳз самараи ташкили чунин чорабиниҳо ва гузаронидани ин қабил корҳои фаҳмондадиҳӣ боис гаштааст, ки имрӯз дар қисмҳои низомӣ сифати таълиму тарбия ва маърифати ҳуқуқии ҳайати шахсӣ беҳтар гардад.
Б. ШАРИФОВ
