Ҷамъомади методӣ-таълимии афсарони соҳаи ақибгоҳии қисму воҳидҳои ҳарбии тобеи марказ, навъҳои қӯшуни Қувваҳои Мусаллаҳи Ҷумҳурии Тоҷикистон ва дигар ҷузъу томи алоҳидаи низомӣ аз ҷониби ҳайати роҳбарикунадаи самти ақибгоҳи Вазорати мудофиа дар сатҳи баланд ташкилу гузаронида шуд. Ҳадаф аз ташкилу баргузории ин ҷамъомадро афсарони масъули соҳа, пеш аз ҳама иҷрои саривақтии дастуру супоришҳои Сарфармондеҳи Олии Қувваҳои Мусаллаҳ, генерали артиш мӯҳтарам Эмомалӣ Раҳмон дар самти таъминоти моддиву маишии хизматчиёни ҳарбӣ, баланд бардоштани савияи донишу малакаи касбии кормандони соҳаи ақибгоҳ оид ба ташкили таъминоти ақибгоҳӣ дар замони осоишта ва ҳолати ҷанг ва самарнок истифода бурдани заминҳои хоҷагии ёрирасони назди қисмҳои ҳарбӣ арзёбӣ намуданд.
Ин аст, ки ҷиҳати дар сатҳи зарурӣ ташкилу гузаронидани машғулиятҳои таълимии ба ҷамъомад пешбинигардида, дар пойгоҳи моддӣ-техникии яке аз қисмҳои ҳарбии Қӯшунҳои зудамали Қувваҳои Мусаллаҳ дар гарнизони Душанбе, тамоми таҷҳизоту лавозимоти зарурӣ барои пешбурди хизмати ақибгоҳӣ дар шароити саҳро фароҳам оварда шуда, масъулин рафти машғулиятҳои амалии афсарони соҳаро дар хаймаҳои саҳроӣ, ки дохили он фарогири ошхонаву нонпазхонаи саҳроӣ, анбору сардхонаҳо, нуқтаи таъминоти моддиву маишӣ ва дигар нуктаҳои зарурии хизматӣ дар самти ақибгоҳӣ буд роҳандозӣ намуданд.
Дар ҷараёни машғулиятҳо таъмини навъҳои техникаҳои ҳарбӣ бо сӯзишворӣ ва равғанҳои молиданӣ низ дар нуқтаҳои таъминоти сӯзишворӣ дар шароити саҳро, ҳангоми иштирок дар машқҳои ҳарбӣ ва зимни иҷрои дигар вазифаҳои хизмативу ҷангӣ нишон дода шуд. Қайд гардид, ки назорати сифат ва дурусту сарфакорона истифода бурдани сӯзишворӣ, равғанҳои молиданӣ ва моеъҳои махсус аз вазифаҳои аввалиндараҷаи афсарони самти ақибгоҳ маҳсуб ёфта, ҳангоми кор бо онҳо риояи талаботи бехатарӣ ҳатмӣ мебошад.
Афсарони ин самти фаъолият дар Артиш, натанҳо таъмин намудани ҳайати шахсӣ бо хӯрока, молу амволи шайъӣ ва таъминоти моддиву техникиро бар ӯҳда доранд, балки онҳо дар қисми ҳарбӣ, машқгоҳи низомӣ ва дар ҳам гуна вазъият барои риояи қоидаҳои пешгирӣ аз ҳодисаҳои сӯхтор ва ҳифзи муҳити зист низ масъул мебошанд. Аз ин ҷост, ки дар рӯзи дуюми баргузории ҷамъомад дар пойгоҳи Полки таъминотӣ ва идоракунии Ситоди генералии Қувваҳои Мусаллаҳи мамлакат тарзи дурусти захира намудан ва нигоҳдории молу маҳсулоти кишоварзӣ, маводи озуқаворӣ ва амволи шайъӣ нишон дода шуд.
Афсарони оид ба таъминоти ақибгоҳи ҷузъу томи ҳарбӣ дар таҳияи нақшаҳои омодагии ҷангӣ, тайёрӣ ва сафарбарии низомӣ иштирок намуда, иҷрои онро аз рӯйи таъиноти хизматии хеш ба роҳ мемонанд. Зеро, дар вазъияти ҷанг ва ҳангоми ҳар гуна таҳдидҳои эҳтимолӣ низ онҳо вазифаи таъминоти моддиву техникии ҳайати шахсӣ ва пеш аз ҳама ба ҷойи таъйиншуда интиқоли ҳама гуна молу амволи шайъӣ ва дигар маҳсулоти ниёзи аввалро бар ӯҳда доранд. Аз ин рӯ, зимни ҷалб гардидан ба чунин ҷамъомадҳои таълимӣ афсарони соҳибтаҷрибаи Раёсати ақибгоҳи Вазорати мудофиа ба масъулини соҳа бо дарназардошти пешрафти замон ва навовариҳои илмиву техникӣ усулҳои муассири таълимиву таҷрибавиро кор мегиранд, то ки афсарони самти ақибгоҳи қисму воҳидҳои ҳарбӣ дар ҳама ҳолат барои иҷрои бомуваффақонаи ӯҳдадориҳои масъулиятноки дар наздашон гузошташуда омода бошанд.
Боқӣ ШАРИФОВ
