Бахшида ба Рӯзи табибон
Тану ҷисми солим ва рӯҳи қавию бенуқсон муҳимтарин арзиш барои инсон дар зиндагӣ ба ҳисоб меравад, ки дар ин асно барои офиятбахшӣ ва солимии рӯҳу тан дар ҷомеаи муосир пизишкон амал мекунанд, ки барои табобату муолиҷаи эҳтиёҷмандон аз худ саҳми босазое мегузоранд.
Дар ҳайати сохторҳои зертобеи Вазорати мудофиаи мамлакат, Раёсати тибби ҳарбӣ, дардмонгоҳи низомӣ, госпиталҳои ҳарбӣ ва нуқтаҳои тиббӣ амал менамоянд, ки табибони низомӣ бо азму иродаи қавӣ дар самти муолиҷаву офиятбахшии беморон ва сари вақт расонидани ёрии аввалия ба ҳоҷатмандон аз худ саҳми арзанда мегузоранд.
Соли 1993 дар ҳудуди гарнизони Душанбе нахустин шифохонаи ҳарбӣ, ё худ Госпитали марказии ҳарбии Вазорати мудофиа таъсис дода шуд, ки он аз шуъбаҳои статсионарӣ ва ёрирасон иборат мебошад. Илова бар ин, соли 1995 дар ҳудуди гарнизони Суғд ва соли 2014 бошад, дар вилояти Хатлон низ госпиталҳои ҳарбӣ бунёд карда шуданд.
Тайи солҳои охир бо шарофати Истиқлоли давлатӣ ва бо назардошти беҳдошти вазъи иҷтимоиву иқтисодӣ
дар кишвар дар муассисаҳои табобатии Вазорати мудофиаи ҷумҳурӣ, ба хусус, дар госпиталҳои ҳарбӣ сатҳи хизматрасонии тиббӣ ва таъминоти дастгоҳу таҷҳизоти ҳозиразамони ташхису муоинавӣ боз ҳам хубтару беҳтар гардида, табибони низомӣ бо ифтихору сарфарозӣ аз ин касби пуршарафи хеш, ки ворисони арзандаи Синои бузург маҳсуб меёбанд, пайваста пайи табобату муолиҷаи дардмандонанд.
Маврид ба зикр аст, ки дар асрҳои 20 ва 21, ҷомеаи ҷаҳонӣ дар пешрафту тараққиёти илми тиб ва инкишофи техникаву технологияи навини ташхису муоинавӣ, ба комёбиву муваффақиятҳои назарраси соҳавӣ ноил гардид. Вале дар баробари тараққиёти ин соҳа, пизишкони замони муосир тайи солҳои охир бо авҷи бемориҳои наве дучор мешаванд, ки барои кашф кардану табобат намудани чунин маризиҳо, онҳо ба монеаву мушкилиҳои зиёд рӯ ба рӯ мегарданд. Дар баъзе ҳолат, зимни муоинаву ташхис ва муолиҷаи ашхоси гирифдори бемориҳои сироятӣ, бо вуҷуди эҳтиёткорона амал намудан, ҷони худро дар хатар мегузоранд. Зеро дар чунин ҳолатҳо, аз эҳтимол дур нест, ки бемории сироятӣ, пеш аз ҳама, ба ҷисму ҷони худи табиб асар намояд.
Далели ин гуфтаҳо, пайдоиши бемории нави сироятии Ковид-19 мебошад, ки ин маризии бисёр хавнок
тамоми сайёраро дар ҳолати ғафлат дарёфта, сахт такон дод, ки дар ин асно ягон муассисаи соҳаи тандурустии ҷаҳон дар самти пешгирӣ аз паҳншавӣ ва роҳи табобати ин вабои аср омода набуд.
Бо пайдоиш ва паҳн гардидани бемории нави коронавирус, табибони низомии Вазорати мудофиа низ дар баробари дигар ҳамкасбони худ дар давраи хурӯҷи ин беморӣ ва то кашфу истеҳсоли ваксинаҳои зидди Ковид-19, тамоми кӯшишу талошҳои хешро ба он равона намудаанд, ки ҳадалимкон хизматчиёни ҳарбиро аз мубталои ин беморӣ эмин нигоҳ доранд.
Дар воқеъ, пизишкони ҳама самту соҳаҳо, ба хусус, табибони низомӣ дар фаъолияти кории хеш масъулияти ниҳоят вазнинро бар дӯш доранд, зеро онҳо бо ҷисму ҷони одамон даст ба коранд ва 
барои офият бахшидани ҳар як шахси бемор низ рӯҳану ҷисман азият мекашанд. Чунин табибон аслан онҳое мебошанд, ки касби худро дӯст медораду аз рӯйи виҷдону масъулият рисолати хешро барои расонидани кӯмаки беғаразонаи тиббӣ ба ҳоҷатмандон дареғ намедоранд. Албатта, ҳар шахс дар симои чунин табибони соҳибкасбу офиятбахш, ҳамрози мушфиқу меҳрубон, ҳамдилу ғамхори дардмандон, муҳофизони Ватан ва ҳимоятгарони рӯҳу танро дида, аз онҳо сипосгузор мешаванд.
Фаридун МАҲМАДАЛИЗОДА,
сардори Маркази матбуот, полковник
