Вазири мудофиаи Ҷумҳурии Халқии Хитой, генерал-полковник Вэй Фэнхэ бо сафари расмӣ баҳри иштирок дар кори ҷаласаи Шӯрои вазирони мудофиаи давлатҳои аъзои Созмони ҳамкории Шанхай ба Тоҷикистон ташриф овард.
Дар Вазорати мудофиаи мамлакат, аъзои Шӯрои давлатии Ҷумҳурии Халқии Хитой-вазири мудофиаи ин кишвар, генерал- полковник Вэй Фэнхэро тибқи ойини низомиён, бо саф оростани ротаи қаровули фахрӣ ва таҳти навои Оркестри ҳарбии нафасӣ вазири мудофиаи кишвар, генерал-полковник Шералӣ Мирзо истиқбол гирифт.
Дар ҷараёни вохӯрӣ, вазирони мудофиаи Тоҷикистону Чин доираи васеи масъалаҳои дуҷониба ва бисёрҷонибаи муносибатҳои низомиро дар самти ҳамкориҳои ҳарбӣ-техникӣ баррасӣ намуда, вобаста ба санаду созишномаҳои ҳуқуқӣ, ки қаблан дар доираи муносибатҳои низомӣ, миёни вазирони мудофиаи ҳарду кишвар ба мувофиқа расидаанд, мубодилаи афкор намуданд. Ҳамзамон, таваҷҷуҳи зиёд ба вазъи кунунии Ҷумҳурии Исломии Афғонистон, масоили таъмини бехатарӣ дар минтақаи Осиёи Марказӣ ва оид ба дигар масъалаҳои амниятӣ дар самти муборизаи муштараки зиддитерристӣ мароқ зоҳир карда шуд.
ВОХӮРИИ ДУҶОНИБА БО ВАЗИРИ МУДОФИАИ ПОКИСТОН
Таъкид кардан ба маврид аст, ки дар доираи омодагӣ ба баргузории ҷаласаи навбатии Шӯрои вазирони мудофиаи давлатҳои аъзои Созмони ҳамкории Шанхай, ҳамчунин вохӯрии дуҷонибаи вазири мудофиаи Тоҷикистон, генерал-полковник Шералӣ Мирзо бо вазири мудофиаи Ҷумҳурии Исломии Покистон, Парвиз Хаттак баргузор гардид. Дар мулоқот доираи васеи масоили ҳамкориҳои ҳарбӣ ва ҳарбӣ-техникӣ, омодасозии кадрҳои низомӣ ва дигар масоили вобаста ба густариши минбаъдаи муносибатҳои низомӣ мавриди баррасӣ қарор гирифтанд. Лозим ба ёдоварист, ки ҳамкориҳои ҳарбӣ ва ҳарбӣ-техникии Вазорати мудофиаи Ҷумҳурии Тоҷикистон бо Ҷумҳурии Исломии Покистон аз соли 2009-ум шурӯъ гардида, он сол аз сол густариш меёбад.
ВОХӮРИИ ДУҶОНИБА БО ВАЗИРИ МУДОФИАИ ФЕДЕРАТСИЯИ РОССИЯ
Дар доираи ҷаласаи кории Шӯрои вазирони мудофиаи давлатҳои аъзои Созмони ҳамкориҳои Шанхай, вохӯрии вазирони мудофиаи Ҷумҳурии Тоҷикистон ва Федератсияи Россия-Шералӣ Мирзо ва Сергей Шойгу баргузор шуд. Сергей Шойгу ба Ҷумҳурии Тоҷикистон ҷиҳати дар сатҳи баланд ташкил намудани ҷаласаи навбатии вазирони мудофиаи давлатҳои аъзои Созмони ҳамкории Шанхай дар шаҳри Душанбе, изҳори сипос намуд. Ҷонибҳо муҳиммияти созишномаҳои ҳамкорӣ дар соҳаҳои ҳарбӣ ва ҳарбию техникӣ, омодакунии кадрҳои низомӣ, табодули иттилооту таҷрибаомӯзӣ дар муборизаи муштараки зиддитеррористӣ ва дигар санадҳои дуҷонибаву бисёрҷонибаро дар сатҳи сарони ҳарду давлат муҳим арзёби намуданд.
ВОХӮРИИ ДУҶОНИБА БО ВАЗИРИ МУДОФИАИ ҲИНДУСТОН
Дар вохӯрии вазири мудофиаи Тоҷикистон генерал-полковник Шералӣ Мирзо бо вазири мудофиаи Ҷумҳурии Ҳиндустон ҷаноби Раҷнат Сингх масоили вобаста ба авзои минтақаи Осиёи Марказӣ, вазъи кунунии Ҷумҳурии Исломии Афғонистон ва таъмини бехатарӣ дар минтақа мавриди баррасиву муҳокимаи амиқ қарор гирифта, ҷонибҳо аз сатҳи ҳамкориҳои низомии дуҷониба изҳори қаноатмандӣ намуданд. Зимни вохӯрӣ, инчунин вобаста ба як қатор масъалаҳои дигари соҳавӣ ва баҳри боз ҳам тақвият бахшидани доираи ҳамкориҳои самарабахши низомӣ мубодилаи афкор сурат гирифт.
Фаридун Маҳмадализода,
Сардори Маркази матбуоти
Вазорати мудофиаи
Ҷумҳурии Тоҷикистон,
полковник
