Истиқлолияти давлатӣ ҳамчун бузургтарин дастоварди таърихии халқи тоҷик, пояи асосии давлатдории миллӣ ва зиндагии осоиштаи мардум ба ҳисоб меравад. Ҳифзу ҳимояи ин неъмати бебаҳо, таҳкими иқтидори мудофиавии кишвар, таъмини амнияту субот ва омодагии ҳамешагӣ барои ҳимояи марзу буми Ватан вазифаи муқаддаси ҳар як шаҳрванди Ҷумҳурии Тоҷикистон мебошад. Дар арафаи таҷлили ҷашни Истиқлоли давлатии Ҷумҳурии Тоҷикистон баргузории чунин чорабиниҳо бозгӯи масъулиятшиносӣ, ҳисси баланди ватандӯстӣ ва омодагии шаҳрвандон барои ҳифзи дастовардҳои даврони соҳибистиқлолӣ ва манфиатҳои миллӣ мебошад
Дар ҳамин замина, дар ноҳияи Вахши вилояти Хатлон ҷиҳати иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон ҷамъомади мудофиаи ҳудудӣ ва санҷиши ҳолати омодабошии ҳайати захираҳои сафарбарӣ баргузор гардид
Дар чорабинии мазкур сардори Ситоди генералии Қувваҳои Мусаллаҳи Ҷумҳурии Тоҷикистон-муовини якуми вазири мудофиаи Ҷумҳурии Тоҷикистон, генерал-лейтенант Саидзода Бобоҷон, роҳбарияти мақомоти иҷроияи ҳокимияти давлатии ноҳияи Вахш, масъулини комиссариати ҳарбӣ, роҳбарони мақомоти ҳифзи ҳуқуқ, дигар сохторҳои қудратӣ ва ташкилоту идораҳои ноҳия иштирок намуда, ҳамзамон ҳолати омодабошии шаҳрвандони дар эҳтиётқарордошта ва дигар қувваю воситаҳои мудофиаи ҳудудиро мавриди санҷиш қарор доданд
Зимни суҳбату мулоқот таъкид гардид, ки таҳкими иқтидори мудофиавии мамлакат, омодасозии ҳайати захираҳои сафарбарӣ ва рушди низоми мудофиаи ҳудудӣ ҳамеша дар меҳвари таваҷҷуҳи роҳбарияти олии давлат қарор дошта, баргузории чунин чорабиниҳо барои баланд бардоштани сатҳи омодагӣ, таҳкими ҳисси ватандӯстӣ, такмили ҳамоҳангии сохторҳои масъул ва таъмини амнияти миллӣ аҳамияти муҳим дорад
Дар ҷараёни ҷамъомад дар баробари ҳайати захираҳои сафарбарӣ техникаву воситаҳои гуногуни хоҷагии халқ низ ҷамъ оварда шуда, ҳолати омодабошӣ ва коршоямии онҳо мавриди санҷиш қарор гирифт
Масъулин ба шаҳрвандоне, ки бо ҳисси баланди масъулиятшиносӣ дар чорабинӣ фаъолона иштирок намуданд, изҳори сипосу миннатдорӣ карда, омодагии онҳоро барои иҷрои вазифаҳои вобаста ба ҳифзи Ватан ва манфиатҳои миллӣ баланд арзёбӣ намуданд
Дар идомаи чорабинӣ дар толори Комиссариати ҳарбии ноҳияи Вахш ҷаласаи ситоди мудофиаи ҳудудӣ баргузор гардида, зимни он масъалаҳои марбут ба ташкили мудофиаи ҳудудӣ, ҳамоҳангии фаъолияти сохторҳои масъул бо аҳолӣ, истифодаи самараноки техникаву таҷҳизот ва такмили омодагии ҳайати захираҳои сафарбарӣ мавриди баррасӣ ва таҳлил қарор дода шуданд.
