Дар доираи нақшаи чорабиниҳои Вазорати мудофиаи Ҷумҳурии Тоҷикистон, ҷиҳати санҷиш ва таҳкими иқтидори мудофиавии мамлакат дар ноҳияи ба номи Мир Сайид Алии Ҳамадонӣ ҷамъомади мудофиаи ҳудудӣ ва санҷиши ҳолати омодабошии ҳайати захираҳои сафарбарӣ баргузор гардид.
Чорабинии мазкур бо ҷамъ омадани сокинони ватандӯсти ноҳияи Ҳамадонӣ, ки аз субҳи барвақт дар макони муқарраргардида ҳозир шуда буданд, оғоз гардид. Бояд қайд намуд, ки дар арафаи таҷлил аз ҷашни Истиқлоли давлатӣ ин ҳамбастагиву масъулиятшиносии сокинон далели равшани он аст, ки онҳо бо рӯҳияи баланди ватандӯстӣ баҳри ободониву созандагии ватан ҳамеша омода буда, дар роҳи ҳифзу ҳимояи истиқлолу озодӣ садоқатмандона хизмат хоҳанд намуд.
Дар ҷамъомади мудофиаи ҳудудӣ муовини вазири мудофиаи Ҷумҳурии Тоҷикистон, роҳбарияти мақомоти иҷроияи ҳокимияти давлатии ноҳия, масъулини сохторҳои қудратӣ ва кормандони дигар ташкилоту идораҳои дар ноҳия фаъолиятдошта иштирок намуда, инчунин теъдоди муайяни техникаву таҷҳизоти хоҷагии халқ дар макони баргузории чорабинӣ ҷамъ оварда шуданд.
Муовини вазири мудофиаи Ҷумҳурии Тоҷикистон ва дигар шахсони масъул дар маҳалли ҷамъшавии ҳайати захираҳои сафарбарӣ ва техникаву воситаҳои минтақаи мудофиаи ҳудудӣ бо иштирокчиён мулоқот анҷом дода, сатҳи омодабошии онҳо ва иҷрои чорабиниҳои пешбинишударо мавриди санҷиш қарор доданд.
Зимни вохӯрӣ ба шаҳрвандоне, ки пас аз гирифтани даъватномаи комиссариати ҳарбӣ сари вақт ба нуқтаҳои муайяншуда ҳозир гардидаанд, барои ҳисси баланди масъулиятшиносӣ ва омодагӣ ҷиҳати иҷрои қарзи шаҳрвандӣ изҳори сипосу миннатдорӣ баён карда шуд.
Ҳамзамон таъкид гардид, ки таҳкими иқтидори мудофиавии кишвар, омодасозии захираҳои сафарбарӣ ва рушди низоми мудофиаи ҳудудӣ ҳамеша дар меҳвари таваҷҷуҳи роҳбарияти олии давлат қарор дошта, маҳз бо чунин рӯҳияи баланди ватандӯстӣ, ваҳдату ҳамдигарфаҳмӣ ва азми қавии шаҳрвандон метавон истиқлолият, тамомияти арзӣ, амният ва манфиатҳои миллии Ҷумҳурии Тоҷикистонро аз ҳар гуна хавфу таҳдидҳои эҳтимолӣ ҳифз намуд.
Дар навбати худ сокинони ноҳияи Ҳамадонӣ бо ҳисси баланди ифтихори ватандорӣ иброз доштанд, ки ҳифзи Ватан, таъмини сулҳу субот ва хизмати содиқона ба давлату миллатро вазифаи муқаддаси худ дониста, ҳамеша барои иҷрои ин рисолати пуршараф омода мебошанд.
Дар анҷоми чорабинӣ як қатор афсарони эҳтиётӣ бо рутбаҳои навбатии ҳарбӣ сарфароз гардонида шуда, инчунин чанде аз падару модароне, ки фарзандонашон дар сафи Қувваҳои Мусаллаҳи Ҷумҳурии Тоҷикистон хизмати содиқона адо менамоянд, барои саҳмашон дар тарбияи ҷавонон дар рӯҳияи ватандӯстӣ бо сипосномаҳои Вазорати мудофиаи Ҷумҳурии Тоҷикистон қадрдонӣ гардиданд.
Сипас, ситоди минтақаи мудофиаи ҳудудии ноҳия ташкил гардида, бо иштироки намояндагони Вазорати мудофиа, масъулини мақомоти иҷроияи ҳокимияти давлатии ноҳия, комиссариати ҳарбӣ, роҳбарони мақомоти ҳифзи ҳуқуқ ва дигар сохторҳои қудратӣ масъалаҳои марбут ба ташкили мудофиаи ҳудудӣ, омодагии ҳайати захираҳои сафарбарӣ, ҳамоҳангии фаъолияти сохторҳои масъул ва истифодаи самараноки қувваю воситаҳои дар ихтиёрбуда мавриди баррасӣ қарор дода шуданд.
