Зимни ҳар як даври омӯзиш афсарони самту соҳаҳои гуногуни Вазорати мудофиа ва навъҳои қӯшуни Қувваҳои Мусаллаҳ мамлакат бо ташкили ҷамъомадҳои гуногуни ҳарбӣ ва ширкат дар он, таҷрибаи андӯхта, тағйиротҳои нави воридкардашудаи фаъолияти корӣ, фановариҳои ҷадиди илму техникаи муосири низомӣ ва дигар мавзуву масъалаҳои муҳими соҳавиро бо ҳам мавриди таҳлилу омӯзиш қарор медиҳанд.
Бо ин мақсад, дар Раёсати Қувваҳои ҳарбӣ-ҳавоӣ ва мудофиаи зиддиҳавоӣ ҷамъомади методӣ-таълимӣ бо сардорони шуъба ва хадамоти молияи раёсатҳои навъи Қувваҳои Мусаллаҳ, комиссариатҳои ҳарбӣ, қисмҳои ҳарбӣ, муассисаҳои тибби ҳарбӣ ва дигар ҷузъу том баргузор гардид.
Ҷамъомади методӣ- таълимӣ аз ҷониби афсарони масъули Раёсати молия ва буҷети ин ниҳоди қудратӣ ҷараён гирифта, зимни он мавзуъҳои ба нақшагирифташуда оид ба талаботҳои Кодекси андози Ҷумҳурии Тоҷикистон ба таҳрири нави он, натиҷагирӣ аз санҷишҳои фаъолияти молиявӣ-хоҷагидорӣ дар ҷузъу томи вазорат, таъйинот ва тартиби таҳияи ҳуҷҷатҳо барои пешниҳоди ҳисоботҳои молиявӣ ва дигар мавзӯоти марбут ба соҳаи молия мавриди омӯзиш қарор гирифт.
Ҳамзамон, дар ин чорабинии омӯзишӣ, талаботи бандҳои алоҳидаи қонунҳои амалкунанда, аз қабили, Қонун «Дар бораи баҳисобгирии муҳосибӣ ва ҳисоботи молиявӣ, «Кодекси андози Ҷумҳурии Тоҷикистон» дар таҳрири нав, Қонун «Дар бораи вазъи ҳуқуқии хизматчиёни ҳарбӣ», Низомномаи таъминоти пулии хизматчиёни ҳарбӣ ва дигар санадҳои меъёрию ҳуқуқӣ дар соҳаи молия муҳокима гардида, вобаста ба иҷрои он ва корбарӣ дар соҳаи ҳуҷҷатҳои молиявӣ роҳу усулҳои нав пешниҳод гардид, ки он дар фаъолияти ҳамарӯзаи масъулини соҳа зарур арзёбӣ карда шуд.
Дар рафти ҷамъомади таълимӣ иштирокчиёни он оид ба пурзӯр намудани назорат аз болои хароҷоти мабласҳои буҷетӣ, роҳ надодан ба исрофкорӣ ва дигар амалҳои хусусияти коррупсионидошта бо супоришҳои мушаххас вазифадор гардиданд.
Дар анҷоми чорабинии мазкур, масъалаҳо оид ба ҷамъбасти сифатноки буҷети Вазорати мудофиа барои соли ҷорӣ аз тарафи гирандагон ва тақсимкунандагони маблағҳои буҷетӣ мутобиқи тобеият баррасӣ гардид ва ҳамчунин аз иштирокчиёни ҷамъомади методӣ-таълимӣ вобаста ба мавзуъҳои дар машғулиятҳо пешбинишуда,санҷиш қабул карда шуд.
Ш. ШАРИФОВ
