Бо мақсади беҳдошти вазъи саломатӣ ва табобату солимгардонии хизматчиёни ҳарбии Қувваҳои Мусаллаҳ дар Ҷумҳурии Тоҷикистон муассисаҳои табобатии ҳарбӣ, аз ҷумла Госпитали марказии ҳарбӣ, госпиталҳои ҳарбӣ дар ҳудуди гарнизонҳои ҷумҳурӣ ва дар назди қисму воҳидҳои низомӣ нуқтаҳои тиббӣ амал мекунанд, ки дорои тамоми шароиту имкониятҳои хизматрасонии тиббӣ мебошанд. Дар ин гуна шароити мусоиду барҳаво табибони низомӣ ва дигар мутахассисони соҳа вазифаву ӯҳдадориҳои касбии хешро сарбаландона иҷро менамоянд. Онҳо низ дар ҳар як давраи хониш зимни ҷамъбасту натиҷагирии он ба ҷамъомадҳои мухталифи соҳавӣ ва машғулиятҳои амалӣ фаро гирифта мешаванд.
Ҷамъомади методӣ-таълимие, ки бо иштироки ҳайати тиббии Вазорати мудофиа ва қисму воҳидҳои ҳарбии ин ниҳод доир гардид, зимни он нахуст масъулини Раёсати тибби ҳарбии Вазорати мудофиа масъулияти табибони низомиро дар ҳифзи саломатӣ ва барқарор намудани солимии хизматчиёни ҳарбӣ муҳим арзёбӣ намуда, аз онҳо даъват намуданд, ки пайваста пайи ҷустуҷӯй навовариҳои илми тиб ва бозомӯзии техникаву таҷҳизоти ҳозиразамони тиббӣ қарор дошта бошанд.
Ҷамъомади мазкур дар пойгоҳҳои Госпитали марказии ҳарбии Вазорати мудофиа ва Маркази таълимии Кумитаи ҳолатҳои фавқулодда ва мудофиаи граждании назди Ҳукумати Ҷумҳурии Тоҷикистон ташкил ва гузаронида шуда, дар рафти он масъулини хадамотҳои тибии ин ниҳоди қудратӣ аз рӯйи мавзӯъҳои ташкили корҳои табобатӣ-ташхисӣ дар госпитали ҳарбӣ, назорати санитарӣ дар Қувваҳои Мусаллаҳи Ҷумҳурии Тоҷикистон, ташкил ва тартиби гузаронидани чорабиниҳои зиддиэпидемиявӣ дар Қувваҳои Мусаллаҳ ба омӯзишу баҳрабардорӣ фаро гирифта шуданд.
Мусаллам аст, ки аксар аз ҳодисаҳои табииву техногенӣ осеббардориҳои гуногун ва дар маҷмӯъ хатар ба ҷисму ҷонро дар пай доранд. Албатта, пешгириву бартарафсозии ин гуна ҳодисаҳои фавқулодда агар тарафи муҳими масъала бошад, вале дар ҳолати ба вуқӯъ пайвастани он расонидани ёрии аввалин ба зарардидагону ҷароҳатбардоштагон аз масъалаҳои муҳиму аввалиндараҷае маҳсуб меёбанд, ки он аз ҳар як нафар ва пеш аз ҳама аз табибон масъулияти баландро дар иҷрои вазифаҳои бар ӯҳда гузошташуда талаб менамояд. Аз ин ҷост, ки ҳайати тиббии ин ниҳоди қудратии кишвар бо ёрии масъулин аз кумитаи мазкур мавзӯъҳоро дар самти расонидани ёрии аввалин дар ҳолатҳои фавқулодда мавриди таҳлилу баррасӣ қарор дода, машғулиятҳои амалӣ оид ба омӯзиши усулҳои расонидани ёрии аввалин ҳангоми захмбардорӣ ва ҳолатҳои фавқулодда, ташкили кори экспертизаи тиббӣ-судӣ дар маҳалли ҳодиса ҳангоми осеббардорӣ ва дигар ҳолатҳоро аз худ намуданд.
Дар воқеъ, ташкили чунин ҷамъомадҳои омўзишии соҳавӣ дар шароити гуногуни хизматӣ ва ҳолатҳои эҳтимолӣ ба самаранокии кору фаъолияти тиббии табибони низомӣ дар сафи ҷузъу томи Артиш мусоидат мекунад. Зеро, онҳо дар фаъолияти ҳамарӯза, яъне замони осоишта, ҳолати ҷанг ва умуман дар ҳама гуна вазъият масъулияти бузурги ҳифзи саломатӣ ва табобату солимгардониро бар ўҳда доранд.
Боқӣ ШАРИФОВ,
майор
