Машғулиятҳои ротавӣ-тактикии ҷузъу томи ҳамлаовари десантии Қӯшунҳои зудамал дар машқгоҳи саҳроии “Фахробод”-и гарнизони Хатлон бо омӯзиши маълумотҳои разветкавии дастрасгардида ва коркарду баррасии он аз рӯйи тамсила ё худ макет, ки дар он матлаби машқҳои навбатӣ пешбинӣ гардида буд, оғоз ёфт.
Зимни оғози машғулиятҳо гурӯҳҳои таъйиншуда пас аз муайян намудани мавзеи ҷойгиршавии душманони шартӣ, ба амалиёт шурӯъ намуда, иҷрои вазифаҳои ҷангиро дар самти безарар гардонидани душманони эҳтимолӣ амалӣ намуданд.
Ба андешаи масъулин мақсади асосии ташкилу роҳандозӣ намудани тамринҳои навбатӣ, ин пеш аз ҳама баланд бардоштани донишу маҳорати тактикии ҳайати шахсӣ ва омодагии доимии онҳо бар зидди ҳама гуна хатару таҳдидҳои эҳтимолӣ мебошад. Ин аст, ки он рӯз дар рафти машқҳои таълимӣ десантчиёни фазои тактикӣ низ бо парашут ба замин фуруд омада, дар доираи ӯҳдадориҳои низомии хеш вазифаҳои дар рафти машқҳо бар дӯш доштаро муваффақона иҷро намуданд.
Умуман, дар ин тамринҳо ҳайати шахсии ҷузъу томи десантӣ бо истифода аз авиатсия, техникаҳои вазнини зиреҳпӯши ҷангӣ, автомашинаҳои махсуси зиреҳдор ва дигар силоҳу муҳиммоти ҳарбӣ вазифаҳои ба онҳо вобасташударо сарбаландона амалан коркард намуданд.
Зимни ҷамъбасти машғулиятҳои ротавӣ-тактикии десантчиён масъулини Вазорати мудофиа ва фармондеҳи Қӯшунҳои зудамал дар назди ҳайати иштирокчиёни он, оид ба амалисозии Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025 баромад намуда, ба маҳорати касбиву қобилияти ҷангӣ ва сатҳи омодагии афсарону сарбозон, баҳои муносиб доданд. Таъкид карда шуд, ки ҳар яки мо ҷиҳати пешгирӣ аз хатарҳои афзояндае чун терроризму экстремизм ҳамеша пайи эҷоди роҳҳои муассири такмили касбият бошему баҳри таъмини амнияти устувор талош намоем.
Ҳамин тавр, барои хизматҳои софдилона, иштироки фаъолона дар тамринҳои ротавӣ-тактикӣ ва дастовардҳои назаррас дар иҷрои вазифаҳои хизматӣ як қатор иштирокчиёни фаъоли ин тамринҳо бо ифтихорномаву сипоснома ва мактубҳои миннатдорӣ ба волидон, сарфароз гардонида шуданд.
Гузашти низомии афсарону сарбозон дар назди минбар бошад анҷомбахши машғулиятҳои ротавӣ-тактикии навбатӣ дар машқгоҳи “Фахробод” гардид.
Боқӣ ШАРИФОВ
