Ҳамаи наваскарон баъди шомил шудан ба сафи Қувваҳои Мусаллаҳи мамлакат ва оғоз намудани хизмат дар қисму воҳидҳои низомӣ, ба омӯзиши курси кӯтоҳмуддати наваскарӣ ҷалб гардида, зимнан бо ёрии афсарону сержантони масъул барои бо тантана ёд намудани Савганди ҳарбӣ омодагӣ мегиранд. Наваскарони даъвати тирамоҳии қисми ҳарбии 16772-и Ситоди генералии Қувваҳои Мусаллаҳ дар гарнизони Душанбе аллакай ин гуна курсҳоро аз худ намудаанд ва барои қабул намудани Савганди ҳарбӣ омода мебошанд.
Ҷамъомади тантанавии савгандёдкунии наваскарон дар ин қисми ҳарбӣ низ бо даровардани Байрақи ҷангӣ ба майдони баргузории чорабинӣ ва таҳти садои Суруди миллӣ оғоз гардид. Воқеан, маросими қабули Савганди ҳарбӣ, ки дар ҳаёти ҳар як ҷавонмарди асил лаҳзаи таърихиву фаромӯшнопазир мебошад, он дар қисмҳои ҳарбии Артиши миллии кишвар, бо риояи муқаррароти ойинномавӣ ва тибқи ойинҳои хоси низомиён басо ҳам хотирмон ташкилу ба роҳ монда мешавад.
Қисмати асосии ҷамъомад, ки лаҳзаи ба маркази майдон баромадани ҳайати шахсии наваскарон мебошад, он ҷо ҷавонаскарони меҳан, саф ба сафи ҳам истода, ҳар яке дар навбати худ бо даъвати афсарон ва дар назди ҳозирин матни савганднома дар даст, сатрҳои пурмӯҳтавои онро ба забон меоранд ва ботанатана қасам мехӯранд.
Ҳамин гуна аст, мӯҳтавони матни Савганди ҳарбӣ, ки ҳар як афсару сарбоз бо ёд намудани он, минбаъд дар давоми хизмат тамоми вазифаву ӯҳдадориҳои масъулиятноки хешро сарбаландонаву софдилона
иҷро менамояд.
Ҷанги тан ба тан бо усуслҳои шарқӣ ва ҳимояи худ аз ин гуна муҳорибаҳо яке аз машғулиятҳои домии ҳайати шахсии қисмҳои ҳарбӣ маҳсуб меёбад, ки он рӯз бо омодагии сатҳи баланд аз ҷониби гурӯҳи сарбозони ин қисми низомӣ намоиш дода шуд.
Афсарони олирутба, командири қисми ҳарбӣ ва падару модарони наваскарон зимни баромади табрикотии хеш ба фарзандони муҳофизи меҳан ё худ сарбозони комилҳуқуқи Артиши ҷавони Тоҷикистон, дар хизмат ба халқу Ватан ва ҳифзи манфиатҳои давлату миллат барору комёбӣ таманно намуда, таъкид карданд, ки ба савганди ёднамудаи худ содиқ монанд ва ҳамчун ҷавонмардони далеру матинирода такягоҳи боэътимоди мардуми ин сарзамин бошанд!
Дар ҳошияи табрикоту таманниёт, ҳамчунин он рӯз як қатор афсарон бо медалу ифтхорномаҳо ва гурӯҳи муайяни сарбозони соҳибимтиёз бо мукофоти пулӣ қадрдонӣ карда шуданд.
Бо гузашти низомӣ ва қадамзаниҳои ифтихорбору тантанавор дар роҳи мудофиаи Ватан ва ҳифзу ҳимояи марзу буми он чорабинии пуршукӯҳ ба муносибати қабули Савганди ҳарбӣ аз ҷониби наваскарони ин қисми низомӣ ба поён расид.
Боқӣ ШАРИФОВ,
майор
