Маросими савгандёдкунии навскарон дар Полки таъминотӣ ва идоракунии Ситоди генералии Қувваҳои Мусаллаҳ бо ворид намудани Байрақи ҷангии қисми низомӣ ба майдони баргузории чорабинӣ ва баъд аз садои Суруди миллӣ оғоз гардид.
Дар ин чорабинии муҳими сиёсӣ, масъулин аз Вазорати мудофиа, афсарони қисми низомӣ ва наздикону пайвандони наваскарон ширкат намуданд.
Ҷавонаскарони омода ба хизмати ҳарбӣ, бо амри командири қисми низомӣ ба маркази майдони сафороӣ дар ҳайати взводҳо саф кашида, дар назди иштирокчиёни ин чорабинӣ, сатрҳои савгандномаро ба забон оварданд ва барои дифо аз ин марзу бум ва хизмати содиқонаву софдилонаро адо намудан қасам ёд карданд.
Албатта, ёд намудани Савганди ҳарбӣ барои ҳар як навскари қисми низомӣ лаҳзаи хотирмону рӯзи фаромӯшнопазир шуморида мешавад. Зеро онҳо баъди қасам ёд кардан, чун сарбозони комилҳуқуқ дар роҳи ҳимояи ин сарзамини аҷдодӣ ва иҷрои бечунучарои вазифаҳои муҳими хизматӣ масъулияти бузургеро бар дӯш мегиранд.
Қобили зикр аст, ки чун муҳофизони ҳақиқии Ватан барои масъулияти ҳимояи марзу буми ин сарзамини муқаддасро бар ӯҳда доштан, аз ҳар як афсару сарбоз албата ҳушёриву зиракӣ, аз бар кардани таълимоти назариявию амалии фанҳои дақиқи низомӣ ва ҳамеша омода буданро дар самти амру фармоишҳои роҳбарон ва командирони худ тақозо мекунад.
Баъд аз анҷоми бахши расмии қасамёдкунии наваскарон масъулин аз Вазорати мудофиа, чанде аз волидони наваскарон ва сарбозони ҷавон дар назди ҳайати шахси баромад намуда, маросими савгандёдкуниро тантанаи шодиву нишот дар ҳаёти шахсӣ ва хизмати содиқонаи онҳо дар назди халқу Ватан арзёбӣ намуда, онҳоро бо ин рӯзи фаромӯшнопазир табрику таҳният карданд.
Таҳти созу навои оркестри ҳарбӣ-нафасӣ гузашти низомии наваскарон ва умуман, ҳайати шахсии Полки таъминотӣ ва идоракунии Ситоди генералии Қувваҳои Мусаллаҳ дар майдони сафороӣ ва аз назди минбар анҷомбахши маросими савгандёдкунии ҷавонаскарони ин воҳиди ҳарбӣ гардид.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
