Дар Бригадаи ҳамалаовари десантӣ-зарбавии Қӯшунњои зудамали Қувваҳои Мусаллаҳ маросими савгандёдкунии наваскарон бо иштироки масъулини ин навъи қӯшун ва дар фазои идона ташкилу ба роҳ монда шуд.
Дар чорабинӣ наваскароне, ки дар даъвати тирамоҳии соли равон шомили Бригадаи ҳамалаовари десантӣ-зарбавии Қӯшунҳои зудамали Қувваҳои Мусаллаҳ гардидаанд, ба маркази майдони сафороии қисми низомӣ тантанавор саф ороста, бо даъвати афсарон ва дар назди ҳозирин сатрҳои савганди садоқатмандӣ ба халқу Ватанро ба забон оварданд.
Албатта, ҳар як сарбоз дар тамоми умри худ як маротиба савганд ёд карда, қавл медиҳад, ки қонуни асосӣ ва қонунҳои Ҷумҳури Тоҷикистонро қатъӣ риоя менамояд ва то нафаси охирин ба халқи худ содиқ мемонад.
Баъди ёд кардани Савганди ҳарбӣ, ҳар як наваскар сарбози комилҳуқуқи Ватан мегардад ва аз ӯ пеш аз ҳама интизоми баланди ҳарбӣ дар иҷрои вазифаву ӯҳдадориҳои хизматӣ талаб карда мешавад.
Қобили зикр аст, ки Бригадаи ҳамлаовари десантӣ-зарбавии Қӯшунҳои зудамал яке аз нерӯҳои эҳтиётии Сарфармондеҳи Олии Қувваҳои Мусаллаҳ ба ҳисоб рафта, аз рўйи барномаи тақвиятдодашудаи омодагии ҷангӣ таълиму тарбият дода мешаванд.
Дар идома десантчиёни меҳан, садоқату самимият ва муҳаббати худро зери Байрақи ҷангии қисми ҳарбӣ бо ибрози сатрҳои басо ҳам пурифтихори хизмати содиқона ба халқу Ватан нишон дода, изҳор доштанд, ки дар ин роҳи пуршараф қадамҳои устувор мегузоранд ва хизмати масъулиятноки низомиро сарбаландонаву саодатмандона пеш мебаранд.
Дар ҷараёни ин чорабинӣ ё худ маросими савгандёдкунии наваскарон, аз ҷониби взводи ҳамлаовари десантии бригадаи мазкур, дар назди ҳозирин роҳу усулҳои ҳимояи хеш дар задухӯрдҳои тан ба тан намоиш дода шуд, ки он хеле ҷолиб сурат гирифт.
Баъд аз табрикоту таманиёт, гузашти низомии ҳайати шахсии Бригадаи ҳамлаовари десантӣ-зарбавии Қӯшунҳои зудамал яке аз ороишҳои асосӣ ва анҷомбахши ин чорабинии муҳими сиёсӣ гардид.
Шоҳин ШАРИФОВ
