Маросими савгандёдкунии наваскарони қисми ҳарбии 16772 чун оини низомиён ва ҳамчун рамзи эҳтиром ба муқаддасоти милливу давлатӣ, нахуст бо гузаронидани Байрақи ҷангӣ аз назди ҳайати шахсӣ ва бо садо додани Суруди миллӣ оғоз гардид.
Дар қисмати асосии ҷамъомад бо амри командири бевоситаи ҷузъу том ҳайати шахсии наваскарон бо қадамзании низомӣ ва бо тартиби муайяннамудаи ойинномаҳои умумиҳарбии Қувваҳои Мусаллаҳ ба маркази майдони баргузории чорабинӣ баромада, сатрҳои баландмазмуну пурмӯҳтавои матни савгандномаро ба забон оварданд.
Ин ҷавонони ватандӯст ва хушбахту саодатманди диёр низ чун насли бузургу қаҳрмони хеш, ки корномаи зиндагиашон мактаби матонату ҷавонмардист қавл доданд, ки хизмати ҳарбиро дар сафи мардони муҳофизи Ватан содиқонаву софдилона баҷо меоранд.
Баъд аз ёд намудани Савганди ҳарбӣ ва сазовор гардидан бо номи пуршарафи сарбозӣ, афсарони масъули Ситоди генералии Қувваҳои Мусаллаҳ, роҳбарияти қисми ҳарбӣ, падару модарон ва наздикону пайвандони ҷавонаскарон, онҳоро ба ин лаҳзаи фаромӯшнопазири ҳаёташон, ки хизмати шарафмандонаи дифо аз марзу буми аҷдодӣ ва якпорчагии ин сарзаминро бар ӯҳда гирифтанд, табрику муборакбод намуда, дар ин роҳи пуршараф барояшон барору комёбиҳои беназир таманно намуданд.
Сарбозон низ дар дар навбати суханронӣ бо каломи мардонагӣ арз доштанд, ки ҳамчун ҳомиёни сарсупурдаву матиниродаи Артиши миллӣ дар ҳимояи марзу буми Ватан ва ҳифзи дастовардҳои даврони соҳибистиқлолии кишвар саҳми арзанда мегузоранд.
Ҷараёни чорабиниро ҳамзамон сарбозони гурӯҳи чорабиниҳои махсуси қисми ҳарбӣ бо ташкилу баргузории машқҳои намоишӣ ё худ ҳимояи хеш дар задухӯрдҳои тан ба тан, ки баёнгари ҷасуриву далерӣ ва омодагии доимии онҳо баҳри ҳифзи марзу буми Ватан аст, боз ҳам рангину хотирмон гардонданд
Дар доираи сиёсати раиятпарваронаи Пешвои миллат муҳтарам Эмомалӣ Раҳмон он рӯз дар идомаи ҷамъомад чанде аз сарбозони соҳибимтиёз бо мукофотҳои пулӣ қадрдонӣ карда шуданд.
Бо гузашти низомӣ ва қадамзаниҳои ифтихорбори афсарону сарбозон дар назди минбар, ҷамъомади тантанавии қабули Савганди ҳарбӣ аз ҷониби наваскарон ба поён расид.
Б. ШАРИФОВ
