Наваскароне, ки дар даъвати баҳории соли равон ба хизмати ҳатмии ҳарбии омадаанд, айни ҳол дар қатори дигар ҳамсафони хеш хизматро дар сафи Қӯшунҳои мудофиаи граждании Кумитаи ҳолатҳои фавқуллода ва мудофиаи гражадании назди Ҳукумати Ҷумҳурии Тоҷикистон пеш бурда истодаанд. Онҳо пас аз анҷоми курси кӯтоҳмуддати ҷанговарони ҷавон дар қисмҳои ҳарбии Қӯшунҳои мудофиаи гражданӣ дар гарнизони Душанбе, дар майдони ғалабаи ноҳияи Рӯдакӣ бо либоси якранги низомӣ саф оростанд, то ки баҳри иҷрои вазифаҳои масъулиятноки хеш Савганди ҳарбӣ ёд намоянд ва минбаъд ҳамчун сарбозони комилҳуқуқи Артиши миллӣ хизматро дар сафи мардони муҳофизи Ватан содиқонаву сарбаландона ба ҷо оранд.
Маросими тантанавии савгандёдкунии ҷавонони далеру шуҷои Ватан дар ин майдони рамзӣ чун ойини доимии низомиён бо даровардани Байрақи ҷангӣ ва бо садо додани Суруди миллӣ аз ҷониби иштирокчиён оғоз гардид.
Дар ин чорабинии пуршукӯҳи низомӣ дар баробари наваскарон, ҳамчунин волидону пайвандони онҳо, масъулини роҳбарикунандаи Кумитаи ҳолатҳои фавқуллода ва мудофиаи гражадании назди Ҳукумати Ҷумҳурии Тоҷикистон, намояндагони бахшу соҳаҳои гуногуни ноҳияи Рӯдакӣ, мактаббачагон ва дигар ҷавонони синни даъватии ноҳия иштирок доштанд.
Наваскарони наздик ба 100 нафараи қисму воҳидҳои ҳарбии ин навъи қӯшун, дар қисмати асосии чорабинӣ бо тартиби муқаррарнамудаи Ойинномаҳои умумиҳарбии Қувваҳои Мусаллаҳ ба сафи пеш ё худ маркази майдони баргузории ҷамъомад ба назди афсарони масъули ҷузъу том баромада, бо қироати матни пурмӯҳтавои Савганди ҳарбӣ дар назди ҳизирин барои садоқат ба халқу Ватан ва хизмати ҷавонмардона қасам ёд намуданд.
Ёд намудани савганд ба муқаддасоти милливу давлатӣ ва дигар арзишҳои умумиинсонӣ ҳар як ҷавонро водор месозад, ки давоми хизмати ҳарбӣ бо масъулияти баланд ва дарки вазифаи шаҳрвандӣ хизмати ҳатмии ҳарбӣ намояд. Аз ин рӯ, барои ҷавонон Савганди ҳарбӣ нахуст дарси низомие маҳсуб меёбад, ки назди волидон ва командирони худ қавл медиҳанд, ки дар роҳи ҳифзу ҳимояи Модар–Ватан то нафаси охирин содиқ монда, бо шуҷоату матонати ҷавонмардона хоки ин сарзаминро муқаддас медоранд.
Воқеан, иҷрои ӯҳдадориҳои масъулиятноки низомӣ дар сафи Қуввҳои Мусаллаҳ аз он рӯзе шурӯъ мегардад, ки савганди садоқатмандиро ба ҷо меоранд. Аз ин рӯ, ҷавонон, ки баҳри иҷрои хизмати муҳлатноки ҳарбӣ дар сафи Қӯшунҳои мудофиаи гражданӣ савганд ёд намуданд, минбаъд вобаста ба таъйиноти ин навъи қӯшун рисолати ҷавонмардонаи хешро назди халқу Ватан бо саҳмгузорӣ дар пешгириву бартарафсозии оқибатҳои ҳолатҳои фавқулодда ва наҷот бахшидан ба зарардидагони офатҳои табииву техногенӣ, иҷро менамоянд.
Дар идомаи чорабинии тантанавӣ ҳайати роҳбарии Кумита, падару модарон ва чанде аз ҳозирин наваскаронро ба муносибати ёд намудани Савганди ҳарбӣ ва сазовор гардидан бо номи пуршарафи сарбози Ватан самимона табрику муборакбод намуда, дар ин пайроҳаи пурифтихори ҷавонмардӣ ва иҷрои вазифаи муҳими шаҳрвандӣ баҳрашон хизмати содиқона ба халқу ватанро таманно намуданд.
Бо баровардани Байрақи чангӣ аз майдон ва гузашти низомии ҳайати шахсӣ дар назди ҳозирин ҷамъомади тантанавии савгандёдкунии наваскарони қисму воҳидҳои ҳарбии Кумитаи ҳолатҳои фавқуллода ва мудофиаи гражадании назди Ҳукумати Ҷумҳурии Тоҷикистон дар гарнизони Душанбе ба поён расид.
Боқӣ ШАРИФОВ
