Ҷамъомади тантанавии савгандёдкунии наваскарони қисми ҳарбии 16772-и Ситоди генералии Қувваҳои Мусаллаҳ бо даровардани Байрақи ҷангӣ ба майдони баргузории чорабинӣ ва таҳти садои Суруди миллӣ оғоз гардид. Воқеан, маросими қабули Савганди ҳарбӣ, ки дар ҳаёти ҳар як ҷавонмарди асил лаҳзаи таърихиву фаромўшнопазир ба ҳисоб меравад, он дар қисмҳои ҳарбии Артиши миллии кишвар бо риояи муқаррароти оинномавӣ ва тибқи оинҳои хоси низомиён ба таври шоиста ва басо ҳам хотирмон ташкилу гузаронида мешавад.
Қисмати асосии ҷамъомад, ки лаҳзаи ба маркази майдон баромадани ҳайати шахсии наваскарон мебошад, он ҷо ҷавонаскарони меҳан, саф ба сафи ҳам истода, ҳар яке дар навбати худ бо даъвати афсарон ва дар назди ҳозирин матни савганднома дар даст, сатрҳои пурмўҳтавои онро ба забон меоранд ва ботанатана қасам мехўранд.
Савганди ҳарбӣ яке аз рукнҳои муҳим аст, ки ҳар як афсару сарбоз бо ёд намудани он минбаъд, дар давоми хизмат тамоми вазифаву ўҳдадориҳои масъулиятноки хешро сарбаландонаву софдилона иҷро менамояд.
Ҷанги тан ба тан бо усуслҳои шарқӣ ва ҳимояи худ аз ин гуна муҳорибаҳо яке аз машғулиятҳои доимии ҳайати шахсии қисмҳои ҳарбӣ маҳсуб меёбад, ки он рўз бо омодагии сатҳи баланд аз ҷониби гурўҳи сарбозони ин қисми низомӣ намоиш дода шуд.
Афсарони олирутба, командири қисми ҳарбӣ ва падару модарони наваскарон зимни баромади табрикотии хеш ба фарзандони муҳофизи меҳан ё худ сарбозони комилҳуқуқи Артиши ҷавони Тоҷикистон дар хизмат ба халқу Ватан ва ҳифзи манфиатҳои давлату миллат барору комёбӣ таманно намуда, таъкид карданд, ки ба савганди ёднамудаи худ содиқ монанд ва ҳамчун ҷавонмардони далеру матинирода такягоҳи боэътимоди мардуми ин сарзамин бошанд!
Дар ҳошияи табрикоту таманниёт, ҳамчунин он рўз як қатор афсарон бо медалу ифтхорномаҳо ва гурўҳи муайяни сарбозони соҳибимтиёз бо мукофотҳои пулӣ қадрдонӣ карда шуданд.
Бо гузашти низомӣ ва қадамзаниҳои ифтихорбору тантнавор дар роҳи мудофиаи Ватан ва ҳифзу ҳимояи марзу буми он, чорабинии пуршукўҳ ба муносибати қабули Савганди ҳарбӣ аз ҷониби наваскарони ин қисми низомӣ ба поён расид.
Боқӣ ШАРИФОВ
майор
