Наваскарони зимни даъвати тирамоҳии шаҳрвандон ба хизмати ҳарбӣ ҷалбгардидаи қисми ҳарбии 02615-и Ситоди генералии Қувваҳои Мусаллаҳ пас аз бомуваффақият сипарӣ намудани курси якмоҳаи наваскарӣ дар назди ҳайати роҳбарӣ, падару модарон ва афсарону сарбозони қисми ҳарбӣ савганд ёд намуданд. Маросими савгандёкунии наваскарон бо риояи қоидаи гузаронидани чорабиниҳои низомиён, ки бо садо додани Суруди миллӣ ва ворид кардани Байрақи ҷангӣ оғоз карда мешавад, идома ёфт.
Сарбозони навдаъватшуда дар майдони қисми ҳарбӣ саф ороста, яке пайи ҳам назди афсарон Савганди ҳарбӣ ёд намуданд. Онҳо бо ёд намудани Савганди ҳарбӣ қавл доданд, ки дар иҷрои вазифа ва уҳдадориҳои ҳарбии худ содиқ монда, баҳри ҳифзи марзу бум ва пос доштани муқаддасоти Ватан ҳамеша талош мекунанд, ки ин албатта аз рисолати таърихии ҷавонмардони тоҷик бармеояд. Аз ин лиҳоз, бо такя ба таърихи гузашта мо ҷавононро мебояд дар таҳкими ваҳдату ягонагӣ ва субботу оромии Тоҷикистон ҳамеша қадамҳои устувор гузошта, савганди садоқатмандонаи ба Ватан ёд намудаи худро гиромӣ дорем. Ҳамзамон, Савганди ҳарбӣ ҳар як сарбозро водор мекунад, ки давоми хизмати ҳарбӣ бо номуси фарзандӣ ва ғурури ҷавонмардона вазифаи конститутсионии худро сарбаландона адо намояд.
Ҳамин тавр, чанде аз афсарони Вазорати мудофиа ва падару модарон наваскаронро ба муносибати қабули Савганди ҳарбӣ табрик намуда, барои онҳо дар роҳи хизмати Ватан далериву бурдборӣ таманно намуданд.
Дар охири чорабинӣ гузашти низомии ҳайати шахсӣ доир гардид, ки қадамзаниҳои мутантани онҳо рамзи пойдории сулҳу субот ва идомаи роҳи пуршарафи хизмати ҷавонмардони Ватан дар таъмини мудофиаи давлат ва мардуми Тоҷикистон мебошад.
Боқӣ ШАРИФӢ
