Ҳамасола якуми сентябр дар кишвар ҳамчун Рӯзи дониш бо шукӯҳу шаҳомати хоса таҷлил гардида, дар тамоми муассисаҳои таълимии оливу миёнаи ҷумҳурӣ дар ин рӯз дарси сулҳ гузаронида мешавад. Бахшида ба ин сана дар Донишкадаи ҳарбии Вазорати мудофиа низ бо омодагии ҳамаҷонибаи ҳайати афсарон ва устодону курсантон чорабинии идона доир гардид. Сараввал афсарону устодон ва курсантони донишкадаи ҳарбӣ, дар толори донишкада суханронии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон мӯҳтарам Эмомалӣ Раҳмонро бахшида ба Рӯзи дониш, ки дар Донишгоҳи давлатии тиббии Хатлон, бо пахши мустақим тариқи шабакаҳои телевизионӣ намоиш дода шуд, сарҷамъона тамошо намуданд.
Пас аз тамошои баромади Пешвои миллат, мӯҳтарам Эмомалӣ Раҳмон ва дарси сулҳ чорабинии тантанавӣ ба муносибати Рӯзи дониш дар майдони сафороии Донишкадаи ҳарбӣ, бо ворид намудани Байрақи ҷангӣ ва садо додани Суруди миллӣ идома ёфт.
Дар чорабинии мазкур вазири мудофиаи Ҷумҳурии Тоҷикистон генерал-полковник Шералӣ Мирзо иштирок ва суханронӣ карда, баҳри дар амал татбиқ намудани дастуру супоришҳои Пешвои миллат, Сарфармондеҳи Олии Қувваҳои Мусаллаҳ, генерали Артиш муҳтарам Эмомалӣ Раҳмон, ки дар Рӯзи дониш ва дарси сулҳ баромад намудаанд, ибрози андеша кард ва ҳайати устодону афсарон ва донишҷӯёни ин муассисаи олии таълимии ҳарбиро бо оғози соли нави хониш табрику таҳният намуд.
Роҳбарияти Вазорати мудофиаи мамлакат дар баромади худ аз ҷумла қайд намуд, ки афсарону устодон ва курсантони ин боргоҳи улуми ҳарбӣ бояд аз омӯзиши фаннҳои дақиқи низомӣ, техникаву технологияи замонавӣ ва илмҳои муосири ҳарбӣ бархурдор бошанд ва ба ин васила барои баланд бардоштани иқтидори мудофиавии кишвар маҳорату малакаи касбӣ ва савияи дониши худро равона намоянд.
Дар идомаи суханронӣ зикр карда шуд, ки аз ҷониби давлату Ҳукумати ҷумҳурӣ ба соҳаи илму маориф ва таълиму тарбияи ҷавонон, алалхусус кадрҳои баландихтисоси соҳаи низомӣ таваҷҷӯҳи хоса зоҳир гардида, маърифатнок намудан ва баланд бардоштани сатҳу сифати дониш дар ҷомеа яке аз ҳадафҳои муҳим ва сиёсати маорифпарваронаи Сарвари давлат ба шумор меравад.
Бо ҳамин тартиб чорабинии тантанавӣ ба муносибати Рӯзи дониш ва дарси сулҳ чун анъана бо гузашти низомии афсарону курсантони Донишкадаи ҳарбӣ ба анҷом расид.
Қобили зикр аст, ки ҳамингуна чорабинии ҷашнӣ бахшида ба оғози соли нави хониш имрӯз дар Литсейи ҳарбии Вазорати мудофиаи мамлакат низ бо иштироки масъулини Вазорати мудофиаи мамлакат, афсарону устодон ва тарбиятгирандагони ин муассисаи миёнаи таълимии ҳарбӣ бо шукӯҳи хоса ва хеле хотирмон доир карда шуд.
Маркази матбуоти
Вазорати мудофиаи
Ҷумҳурии Тоҷикистон
