Дар Донишкадаи ҳарбии Вазорати мудофиаи Ҷумҳурии Тоҷикистон ба муносибати Рӯзи дониш ва Дарси сулҳ чорабинии тантанавӣ баргузор гардид, ки дар он вазири мудофиаи Ҷумҳурии Тоҷикистон, генерал-полковник Эмомалӣ Собирзода, афсарону прапоршикон, устодону омӯзгорон, курсантон ва дигар меҳмонон иштирок намуданд.
Чорабинии идона бо ворид намудани Байрақи ҷангӣ ба майдон оғоз ёфт. Ин маросим бо тартибу низоми хос сурат гирифта, аз арҷгузорӣ ба муқаддасоти давлатӣ, садоқат ба Ватан ва эҳтиром ба арзишҳои миллӣ дарак медиҳад. Пас аз садо додани Суруди миллии Ҷумҳурии Тоҷикистон вазири мудофиа тамоми ҳозиринро ба муносибати 35-солагии Истиқлолияти давлатӣ, Рӯзи дониш ва дарси сулҳ самимона табрик намуд.
Зимни суханронӣ таъкид гардид, ки расидан ба ин рӯзи фархунда ва дастовардҳои имрӯза натиҷаи сиёсати созандаю дурбинонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва заҳмати содиқонаи мардуми кишвар мебошад. Истиқлолияти давлатӣ барои миллати тоҷик заминаи устувори рушди тамоми соҳаҳои ҳаёти ҷомеа, аз ҷумла маориф, илм ва омодасозии кадрҳои баландихтисосро фароҳам овард.
Гуфта шуд, ки бо дастгирии пайвастаи Пешвои миллат ва Ҳукумати Ҷумҳурии Тоҷикистон солҳои охир шароити таълиму тарбия дар муассисаҳои таҳсилоти олии кишвар, аз ҷумла дар Донишкадаи ҳарбии Вазорати мудофиа, ба маротиб беҳтар гардидааст. Барои омодасозии мутахассисони ҷавобгӯ ба талаботи замони муосир имкониятҳои зарурӣ фароҳам оварда шуда, заминаи моддию техникии муассиса пайваста таҳким меёбад.
Ҳамчунин зикр гардид, ки нақши озмунҳои ҷумҳуриявӣ дар бозёфт ва муаррифӣ намудани истеъдодҳои ҷавон, баланд бардоштани шавқу рағбати насли наврас ба илму дониш ва омода намудани мутахассисони баландихтисос муҳим арзёбӣ мегардад.
Бояд қайд намуд, ки то имрӯз Донишкадаи ҳарбии Вазорати мудофиа беш аз чор ҳазор нафар мутахассисони соҳаи низомиро омода намуда, хатмкунандагони он имрӯз дар сохторҳои гуногуни Қувваҳои Мусаллаҳи Ҷумҳурии Тоҷикистон содиқона хизмат менамоянд ва дар таҳкими иқтидори мудофиавии кишвар саҳми арзандаи худро мегузоранд.
Бо дастгирии Ҳукумати Ҷумҳурии Тоҷикистон ва саҳми пайвастаи Вазорати мудофиа шароити таълиму тарбия дар Донишкадаи ҳарбӣ сол то сол беҳтару мукаммал мегардад. Синфхонаҳои таълимӣ бо таҷҳизоти зарурӣ таъмин буда, заминаи таълимӣ ба талаботи замони муосир мутобиқ карда мешавад. Ин ҳама имконият медиҳад, ки курсантон дар баробари донишҳои назариявӣ, малакаҳои амалии касбӣ ва низомиро низ ба таври зарурӣ аз худ намоянд.
Дар қисмати хотимавии чорабинии тантанавӣ ҳайати курсантон таҳти навои оркестри ҳарбӣ-нафасӣ дар назди роҳбарияти Вазорати мудофиаи Ҷумҳурии Тоҷикистон ва дигар меҳмонон гузашти низомӣ анҷом доданд.
