Дар доираи ҳамкориҳои пайвастаи Вазорати мудофиаи мамлакат ва Кумитаи кор бо ҷавонон ва варзиши назди Ҳукумати Ҷумҳурии Тоџикистон, дар самти татбиқи босамари сиёсати давлатии ҷавонон, ҳафтаи сипаригардида, бо ташаббуси Филиали Иттифоқи ҷавонони Тоҷикистон дар шаҳри Душанбе дар Донишкадаи ҳарбии Вазорати мудофиа рӯзи дарҳои кушод доир гардид.
Ҳайати меҳмонон ва ҷавонони насли ояндасози давлату миллатро дар саҳни ҳавлии донишкада масъулин таҳти навои мусиқачиёни оркестри ҳарбӣ-нафасӣ пешвоз гирифтанд.
Чорабинии тарғиботии навбатӣ, ки таҳти унвони “Хизмат дар сафи Қувваҳои Мусаллаҳи Ҷумҳурии Тоџикистон вазифаи шаҳрвандии ҳар яки мост” ташкилу роҳандозӣ гардида буд, зимни он намояндагони Кумитаи кор бо ҷавонон ва варзиши назди Ҳукумати Ҷумҳурии Тоџикистон, Шуъбаи маорифи ноҳияи Сино ва толибилмони чанде аз муассисаҳои таҳсилоти миёнаи умумии ҳудуди ин ноҳияи пойтахт аз шароити буду боши ҳайати афсарон ва устодону курсантони донишкадаи мазкур дидан намуданд.
Толибилмон бо шиносоӣ аз имкониятҳои васеи таълиму тадрис ва раванди машғулиятҳои таълимӣ дар Донишкадаи ҳарбӣ, ҳамчунин аз дигар шароитҳои зарурии фароҳамбуда дар ин боргоҳи илми низомӣ шинос гардиданд. Бо курсантоне, ки дар курсҳои гуногуни Донишкадаи ҳарбӣ таҳсил доранду илми низомӣ меомӯзанд, сӯҳбату вохӯриҳо анҷом доданд.
Зимни баргузории ҷамъомад дар толори донишкада, масъулин ба сухан баромада, ҳадаф аз баргузории ин чорабиниро, ки ба рӯзҳои даъвати ҷавонон ба хизмат дар сафи Қувваҳои Мусаллаҳ рост омадааст, қабл аз ҳама бедор намудани ҳисси ватанпарастию худшиносии насли наврасу ҷавонони кишвар ва дар рӯҳияи баланди садоқат ба халқу Ватан тарбия намудани ин қишри некбину ташаббускори ҷомеа арзёбӣ карданд.
Ҳамин тавр, дар фарҷом ба як қатор иштирокчиёни чорабинӣ ва пеш аз ҳама ба афсарону курсантони ин мактаби олии ҳарбӣ тӯҳфаҳои хотиравӣ тақдим карда шуд.
Боқӣ ШАРИФОВ
