Ҷамъомади методӣ-таълимии муовинони фармондеҳони навъҳои Қувваҳои Мусаллаҳ, муовинони командирон оид ба ақибгоҳ ва сардорони хадамотҳои ақибгоҳии қисму воҳидҳои ҳарбии Вазорати мудофиа ин навбат дар пойгоҳи чанде аз қисмҳои ҳарбии Қӯшунҳои зудамал ва Қувваҳои ҳарбӣ-ҳавоӣ ва мудофиаи зиддиҳавоии Артиши миллии мамлакат ташкилу ба роҳ монда шуд.
Зимни оғози ҷамъомади мазкур муовини вазири мудофиа оид ба ақибгоҳ, генерал-майор Бобоҷон Саидзода дар назди ҳайати шахсӣ баромад намуда, диққати ҳозиринро ба таъминоти ақибгоҳӣ, ки омодабошии ҷангии қисму воҳидҳои ҳарбӣ ба он вобастагии зич дорад, ҷалб намуд.
Дар нуқтаҳои таълимӣ барои афсарони соҳа амалҳои гуногун оид ба риояи дурусти қоидаҳои гигиенаи шахсӣ дар рафти хизмати рӯзмарра ва иҷроиши ҳатмии талаботи оинномавии онҳо, бо роҳу усулҳои гуногун ва таҷрибаи пешқадам нишон дода шуд.
Ҳамин тавр, дар қисмати намоишии ҷамъомад иштирокчиён аз ҳолати нигоҳдории борхалтаи сарбозӣ ва маҳсулоту таҷҳизотҳои он, шароити фароҳамовардашуда дар хобгоҳи сарбозон ва вобаста ба ҳолати таъминоти ақибгоҳӣ дар ин қисми ҳарбӣ бошад, аз анбори сабзавоту мевагиҳо, хӯрока ва дигар молу амволи шайъӣ дидан намуданд.
Дар хоҷагии ёрирасон гармхонаҳо ва ҳуҷраҳои меваю сабзавотхушккунӣ бунёд карда шудааст, ки шароити фароҳамовардашуда дар он барои истифодабарӣ ва хушк намудани ҳама намуди меваю сабзавот басо ҳам мусоид мебошад.
Дар анборҳои нигоҳдории молу маҳсулот дар пойгоҳи яке аз қисмҳои ҳарбии ин навъи қӯшун, ки ба ҳайати шахсӣ нишон дода шуд, сардхонаҳои замонавӣ низ сохта ба истифода дода шудааст.
Умуман, имрӯз масъулин оид ба таъминоти ақибгоҳии қисму воҳидҳои ҳарбӣ дар ҳамаи самтҳои таъминоту хизматрасонӣ ба дастовардҳои арзандаи соҳавӣ ноил гардиданд, ки он албатта аз шароити хубу таъминоти босифати хизматчиёни ҳарбӣ дар қисму воҳидҳои низомӣ дарак медиҳад. Аз ҷумла, бо ташкили фермаҳои чорводориву мурғпарварӣ масъулин азм доранд, ки таъминоти хизматчиёни ҳарбӣ бо шир, гушт, тухм ва дигар маҳсулоти аз онҳо истеҳсолшаванда боз ҳам дар сатҳи баланд роҳандозӣ намоянд.
Зимни ҷамъбасту натиҷагирии ҷараёни баргузории ҷамъомади методӣ — таълимӣ масъулини роҳбарикунандаи Вазорати мудофиаи мамлакат дар самти ақибгоҳӣ вобаста ба дастуру супоришҳои Сарфармондеҳи Олии Қувваҳои Мусаллаҳ, генерали артиш, муҳтарам Эмомалӣ Раҳмон дар мулоқот бо марзбонони кишвар оид ба таъминоти хубу босифати хизматчиёни ҳарбӣ баромад намуда, таъкид карданд, ки заминҳои хоҷагиҳои ёрирасони назди қисмҳои ҳарбиро самаранок истифода бурда, ба кишту парвариши маҳсулот ва риояи дурусти қоидаҳои агротехникӣ диққату таваҷҷуҳи ҷиддӣ зоҳир намоянд.
Ҳамин тавр, дар охир барои нишондодҳои хуби корӣ ва иштироки фаъолона дар ҷамъомади методӣ-таълимӣ як қатор афсарони соҳа бо ифтихорнома ва туҳфаҳои хотиравӣ қадрдонӣ карда шуданд.
Боқӣ ШАРИФӢ
