Дар асоси нақша-чорабиниҳои Кумитаи иҷроияи Ҳизби халқии демократии Тоҷикистон дар шаҳри Душанбе ҷиҳати сазовор таҷлил намудани 33-солагии Истиқлолияти давлатии Ҷумҳурии Тоҷикистон дар толори “Кохи афсарон”-и Вазорати мудофиаи мамлакат ҳамоиши тантанавӣ зери унвони “Рушди иқтидори мудофиавии Ҷумҳурии Тоҷикистон дар даврони 33 соли Истиқлоли давлатӣ” баргузор гардид.
Дар ҳамоиши мазкур масъулини Кумитаи иҷроияи Ҳизби халқии демократии Тоҷикистон дар шаҳри Душанбе ва ноҳияҳои он, намояндаи Маркази тадқиқоти стратегии назди Президенти Ҷумҳурии Тоҷикистон ва афсарону сарбозон иштирок намуданд.
Дар оғози ҳамоиш намояндагони Кумитаи иҷроияи Ҳизби халқии демократии Тоҷикистон ба сухан баромада, қайд карданд, ки Истиқлоли давлатӣ муҳимтарин неъмат ва дастоварди арзишманди миллати тоҷик ба ҳисоб меравад. Самараи истиқлолу озодӣ ва заҳмату талошҳои фарзандони фарзонаи миллати тоҷик буд, ки бақои давлату давлатдории тоҷикон таҳким ёфта, асосҳои сохтори конститутсионӣ муайян карда шуд ва муносибатҳои ҷамъиятии ҳамаи соҳаҳо, аз ҷумла, соҳаи мудофиа, ки ячейкаи муҳим дар ҳифзи давлату миллат ба ҳисоб меравад, бо эҷоду амалигардонии заминаҳои меъёриву ҳуқуқӣ танзим гардид.
Дар идома Зубайдулло Давлатзода-сардори Раёсати таъминоти иттилоотии Маркази тадқиқоти стратегии назди Президенти Ҷумҳурии Тоҷикистон дар мавзӯи “Истиқлолияти давлатӣ кафолати рушди бемайлони давлату миллат” маъруза намуд. Зимни маъруза гуфта шуд, ки дар таърихи навин волотарин дастовард дар баробари соҳиб шудан ба Истиқлоли давлативу миллӣ рушди ҳамаҷонибаи Ҷумҳурии Тоҷикистон, аз ҷумла, пурзӯр гардидани иқтидори мудофиавӣ мебошад. Ҷавонони далеру сарбаланди тоҷик, ки дар сафи Қувваҳои Мусаллаҳи мамлакат хизмат ба Ватан доранд, таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон музаффариятҳои зиёдро касб намудаанд.
Ҳамзамон, дигар баромадкунандагон низ таъкид карданд, ки халқи тоҷик дар таъмини иқтидори мудофиавӣ ва ҳифзи марзу буми Тоҷикистон ба ҷавонон эътимод дорад. Ҳамин аст, ки аз ҷониби роҳбарияти давлату Ҳукумати мамлакат барои дастгирӣ ва амалӣ намудани сиёсати давлатии ҷавонон пайваста тадбирҳо андешида мешаванд.
Боқӣ ШАРИФӢ
подполковник
