Аз аввали моҳи июли соли 2022 дар Қувваҳои Мусаллаҳи Ҷумҳурии Тоҷикистон даври дуюми омӯзишӣ оғоз ёфт. Ба ин муносибат рӯзҳои 3-юм ва 4-уми июли соли равон бо ҷалби ҳайатҳои роҳбариву фармондеҳии Вазорати мудофиаи мамлакат, ҷамъомад ё худ машғулиятҳои методӣ-таълимӣ баргузор гардиданд.
Ҷамъомади методӣ-таълимӣ давоми 2 рӯз дар гарнизонҳои Душанбеву Хатлон ва дар пойгоҳи қисмҳои низомии тобеи Вазорати мудофиаи ҷумҳурӣ ба таври назариявию амалӣ ҷараён гирифт. Машғулиятҳо таҳти назорати роҳбарияти Вазорати мудофиа ҷараён гирифта, ба он муовинони вазири мудофиа, фармондеҳони навъи Қувваҳои Мусаллаҳ, комиссарони ҳарбии вилоятҳо, командирони қисмҳои низомӣ ва муовинони онҳо оид ба тайёрии ҷангӣ ҷалб карда шуданд.
Ҳамин тариқ, иштирокчиёни ҷамъомади методӣ-таълимӣ вобаста ба мақому сатҳи вазифавӣ дар Артиши миллӣ ба гурӯҳҳо тақсим шуда, ба омӯзиши машғулиятҳои гуногуни ҳарбӣ, аз қабили тайёрии амалиётӣ,, сафарбарӣ, тайёрии ҷамъияти давлатӣ, хадамоти қӯшун ва бехатарии хизмати ҳарбӣ, рондану тирпарронӣ намудан аз тӯп ва техникаҳои мухталифи вазнини зиреҳпӯши ҷангӣ, силоҳу муҳиммоти оташфишони сабуки ҳарбӣ ва ба санҷиши омодагии ҷисмонӣ ҷалб карда шуданд.
Рӯзи дуюми машғулиятҳои намунавии методӣ-таълимӣ дар Маркази таълимии Фахрободи вилояти Хатлон ҷараён гирифт, ки иштирокчиёни он дар баробари омӯзиши дарсҳои мухталифи низомӣ, ҳамзамон аз бинову иншооти муҷаҳҳаз, аз қабили нуқтаҳои таълимӣ, ошхонаву ҳаммомхонаи сарбозӣ, мавзеъҳои ёрирасони коммуналӣ ва аз дигар шароитҳои хизмативу маишӣ ва ҳам таълимии он дидан ба амал оварданд.
Ҳадаф аз баргузории ҷамъомади методӣ-таълимӣ ин дар амал нишон додани роҳу усулҳои нави омӯзишӣ дар Қувваҳои Мусаллаҳ мебошад. Яъне ташаккул додани назару муносибати ягона ба масоили омодагии ҷангӣ, ташкили хидмати дохилии қӯшунҳо, мувофиқ намудани ҳудуди шаҳракҳои ҳарбӣ, майдончаҳои варзишӣ ва дигар мавзеҳои таълимии афсарону сарбозон ба талаботи ойинномаҳои ҳарбии Қувваҳои Мусаллаҳ мебошад.
Қобили зикр аст, ки шароитҳои намунавии омӯзишӣ, на танҳо барои гузаронидани машғулиятҳои методӣ-таълимӣ ва нишон додан ба иштирокчиёни он аст, балки ин гуна шароитҳо пеш аз ҳама барои омӯзиши доимии ҳайати шахсии қисмҳои низомӣ ба таври муосир бунёд карда шуда, он дар дигар ҷузъу томи ин ниҳоди қудратӣ ба тадриҷ муҳайё карда мешаванд. Аз ин рӯ зимни баргузории чунин ҷамъомадҳо ҳар дафъа талаботи нав ва навовариҳои зиёде барои иштирокчиёни он ворид мегардад.
Ба ҳамин тартиб дар давоми чанд соли охир ҳатто дар қисмҳои низомии навтаъсиси Вазорати мудофиа, заминаҳои намунавии моддиву таълимӣ, хидматӣ ва ҳам шароитҳои маишиву фароғатии афсарону сарбозон дар сатҳи баланд муҳайё карда шудаанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Ҷумҳурии Тоҷикистон,
полковник
