Фасод ва ришваситонӣ яке аз масъалаҳои мушкили ҷомеа буда, монеи рушди давлатҳо мегардад. Бо назардошти умқи решаҳои иҷтимоӣ, таъсири он ба ҷомеа ва дурнамои рушди кишвар фасодро метавон ба мисли дигар таҳдиду хатарҳои муосир, аз қабили терроризм, ифротгароӣ, гардиши ғайриқонунии маводи мухаддир, ҷиноятҳои фаромиллӣ ва ғайра ба шумули таҳдид ва хатарҳои муосир ворид намуд.
Фасод ва ришваситонӣ яке монеаҳои ҷиддӣ дар роҳи рушди кишварҳо ва риояи ҳуқуқу озодиҳои инсон ба шумор меравад. Зеро манфиати шахсӣ ва ришваситонӣ метавонад ба амнияти миллӣ ва рушди устувори иҷтимоию иқтисодӣ халал ворид намуда, бовариро ба сохторҳои қудратӣ, хизматчии давлатӣ ва зиёиёну омӯзгорон коҳиш дода, бунёди ҷомеаи демократиро заиф созад, ки заминаи поён рафтани ҳуқуқҳои фитрии инсон мегардад.
Бо дарки хатари ин зуҳуроти номатлуб Президнти Ҷумҳурии Тоҷикистон, мӯҳтарам Эмомалӣ Раҳмон аз рӯзи аввали ба сари қудрат омаданаш бо фасод муборизаи бе амон эълон намуда, таваҷҷуҳи тамоми сохторҳои қудратӣ ҷомеаи шаҳрвандиро ба муқобилият алайҳи ин масъала ҷалб намуданд. Чунончи, Пешвои муаззами миллат дар Паёми худ ба Маҷлиси Олии Ҷумҳурии Тоҷикистон аз 26-уми январи соли 2021 таъкид доштанд: “Барои пешгирӣ кардани кирдорҳои коррупсионӣ, фароҳам овардани фазои оштинопазир ба он ва ба ин раванд ҷалб намудани тамоми мақомоти давлатӣ, воситаҳои ахбори омма ва ниҳодҳои ҷомеаи шаҳрвандӣ аз ҷониби субъектҳои мубориза бар зидди коррупсия бояд чораҷӯӣ карда шавад.”
Барои ташаккули заминаи ҳуқуқии мубориза бо ин вабои аср ба ғайр аз қисматҳои Кодекси ҷиноятӣ ҳуҷҷатҳои зарурӣ , аз қабили “Стратегияи мубориза бо коррупсия дар Ҷумҳурии Тоҷикистон барои солҳои 2008-2012” аз 26-уми январи соли 2008, №34; “Стратегияи мубориза бо коррупсия дар Ҷумҳурии Тоҷикистон барои солҳои 2013-2020” аз 30-юми августи соли 2013 , №1504 ва “Стратегияи давлатии муқовимат бо коррупсия дар Ҷумҳурии Тоҷикистон барои давраи то соли 2030” аз 3-юми августи соли 2021, №222 қабул карда шуданд.
Фасод ва ришваситонӣ яке аз таҳдидҳои сатҳи ҷаҳонӣ буда, ба дастёбӣ ба ҳадафҳои рушди устувор, истиқрори сулҳ ва ҳамкории мутақобила дар саҳнаи байналмилалӣ монеа мегардад. Аз ин рӯ, мубориза бо он аз ҷониби тамоми ниҳод ва созмонҳои байналмилалӣ, махсусан Созмони Милали Муттаҳид ҳамчун яке аз вазифаҳои аввалиндараҷа эътироф карда шудааст.
Ин аст, ки барои пешгирӣ аз ҳама гуна ҷинояту ҷинояткорӣ ва муборизаи беамон бурдан бо фаъолияти коррупсионӣ 31-уми октябри соли 2003 Конвенсияи Созмони Милали Муттаҳид оид ба мубориза бар коррупсия қабул карда шуда, 9-уми декабри соли 2003 дар шаҳри Меридаи кишвари Мексика дар Конфронси сиёсии сатҳи баланд бо иштироки намояндагони зиёда аз 100 давлат барои ҳамроҳшавии дигар давлатҳои ҷаҳон баргузор гардид. Ҳамин тариқ, 9-уми декабр ҳамчун “Рӯзи байналмилалии мубориза бо коррупсия” пазируфта шуд.
Ҷумҳурии Тоҷикистон ба Конвенсияи мазкур 25-уми сентябри соли 2006 имзо гузошт ва он аз ҷониби Маҷлиси намояндагони Маҷлиси Олии кишвар 16-уми апрели соли 2008 тасдиқ гардид. Аз замони тасвиби “Конвенсияи Созмони Милали Муттаҳид зидди коррупсия” 25-уми сентябри соли 2006 то ба имрӯз дар Тоҷикистон беш аз 20 санади меъёрии ҳуқуқие, ки асосҳои ташкиливу ҳуқуқии самтҳои мухталифи муқовимат ба коррупсияро муқарар менамояд.
Аз ҷониби дигар, мубориза бо ришваситонӣ танҳо кори мақомоти дахлдор набуда, ширкати тамоми ҷомеаи шаҳрвандӣ ва ҳар як сокини бонангу ори кишварро тақозо менамояд.
Амриддин ШАРИПОВ,
устоди ДМТ
