Афсарони масъули самту соҳаҳои мухталифи Вазорати мудофиа, навъҳои қўшуни Қувваҳои Мусаллаҳ, қисмҳои ҳарбии тобеи онҳо ва дигар ҷузъу томи алоҳидаи низомӣ дар ҷараёни машғулиятҳои ҳар як даври омӯзишӣ дар Артиши миллӣ, ба ҷамъомадҳои методӣ — таълимӣ, амалиётӣ — сафарбарӣ ва дигар чорабиниҳои нақшавӣ ҷалб карда мешаванд.
Бо ин мақсад дар асоси Нақшаи тайёрии Қувваҳои Мусаллаҳи Ҷумҳурии Тоҷикистон дар пойгоҳи қисми ҳарбии 16772-и Ситоди генералии Қувваҳои Мусаллаҳи Ҷумҳурии Тоҷикистон бо ҷалби сардорони ситоду муовинони онҳо, афсарон оид ба сафарбарии ҷузъу том, намояндагони хадамоти қўшун ва бехатарии хизмати ҳарбӣ аз тамоми қисму воҳидҳои низомӣ, ҷамъомади амалиётӣ-сафарбарӣ доир гардид.
Масъулияти ташкил ва баргузории ҷамъомадро афсарони Дастгоҳи марказии вазорат ва Ситоди генералии Қувваҳои Мусаллаҳ бар ўҳда доштанд, ки дар баробари баррасии самтҳои муассири фаъолияти корӣ бо дарназардошти пешрафту тараққиёти ҷомеаи муосир, фановариҳои ҷадиди илми ҳарбӣ ва техникаву таҷҳизоти муосири низомӣ, инчунин вазъи ҳарбӣ — сиёсии минтақа ва ҷаҳонро низ мавриди таҳлилу омўзиши ҳамаҷониба қарор доданд.
Қобили қайд аст, ки сардорони ситод дар замони осоишта ва ҳолати ҷанг вазифаҳои муҳим ва ҳам масъулиятноки низомиро бар ўҳда доранд. Аз ин ҷост, ки донишу малакаи касбии худро пайваста дар самти ташкил ва дар сатҳи зарурӣ идора кардани ҷузъу том, омодагии ҷангиву сафарбарии қўшунҳо, ташкили хизмати қаровуливу тартиботи дохилӣ, риояи интизоми ҳарбӣ ва ахлоқию рўҳияи ҳайати шахсӣ ва иҷрои бомуваффақияти вазифаҳои дар наздашон буда, такмилу тақвият мебахшанд. Аз ин лиҳоз дар ҷамъомади навбатӣ низ мавзўи машғулиятҳои афсарони масъули ситод, асосан тартиби самтгирӣ дар маҳал ё худ самтгирии маҳалнигорӣ, ташкили хизмати қаровулӣ ва тайёрии қаравулҳо, тартиби гузаронидани омўзиши шаҳрвандони дар эҳтиёт қарордошта ва дигар мавзӯву масъалаҳоро дар бар мегирифт.
Дар доираи нақшаи баргузории ҷамъомади амалиётӣ — сафарбарӣ дар пойгоҳи таълимии ин қисми ҳарбии Ситоди генералии Қувваҳои Мусаллаҳ аз ҷониби ҳайати шухсии гурӯҳи чорабиниҳои махсус машқҳои ҳимояи худ аз задухӯрдҳои тан ба тан бо усулҳои шарқӣ ва ҳамзамон, машқҳои тактикӣ вобаста ба дастгиру безараргардонии душманони шартӣ намоиш дода шуд, ки албатта он аз омодагии сатҳи баланд ва қобилияти чангии ин гурӯҳи муҳофизони Ватан дарак медиҳад.
Ҳангоми натиҷагирӣ аз машғулиятҳои таълимӣ, ки он бо иштироки сардори Ситоди генералии Қувваҳои Мусаллаҳ доир гардид, зикр карда шуд, ки мо бояд бо таҳлил ва хулосабарорӣ аз вазъи кунунии ҷаҳони муосир дар фаъолияти хизматии худ масъулияти баланди корӣ нишон дода, дар маҳалли хизмат назорати дурусти ҷобаҷогузориву нигоҳдории силоҳу техникаҳои ҳарбиро мувофиқи талаботи мавҷуда ба роҳ монем, ҳолати корӣ ва омодабошии доимии онҳоро назорат намуда, дар ин замина, вазифаи асосии худ, яъне хизмати содиқона баҳри ҳифзи марзу буми кишварро дар мадди аввал ва ҳадафи асосии худ қарор диҳем.
Боқӣ ШАРИФОВ
майор
