Маъракаи даъват ба хизмати ҳарбӣ яке аз чорабиниҳои муҳими давлатӣ ба шумор меравад, ки он ҳамасола дар ду мавсим ва дар асоси Фармони Президенти Ҷумҳурии Тоҷикистон ташкилу роҳандозӣ карда мешавад. Ҳоло дар саросари кишвар даъвати тирамоҳӣ ба хизмати ҳарбӣ бомаром ҷараён дорад. Лозим ба таъкид аст, ки дар рӯзи аввали даъват Вилояти Мухтори Кӯҳистони Бадахшон нақшаи пешбинигардидаро пурра ва дар сатҳи баланд иҷро намуд.
Фаъолияти назарраси масъулини самти даъват дар шаҳри Душанбе ва шаҳру ноҳияҳои вилояти Хатлон боис ба он гардид, ки онҳо низ нақшаи пешбинигардидаро сад фоиз ва пеш аз муҳлати муқарраргардида иҷро намуданд. Дар дигар шаҳру ноҳияҳои мамлакат низ ин маъракаи муҳим идома ёфта, бо гузашти қариб панҷоҳ рӯз нақшаи даъват дар вилояти Суғд зиёда аз 96 фоизро ташкил дод. Ҳоло шаҳру ноҳияҳои Айнӣ, Кӯҳистони Масчоҳ, Шаҳристон, Панҷакент, Истиқлол, Бӯстон, Гулистон, Спитамен, Ҷаббор Расулов, Исфара, Хуҷанд ва Бобоҷон Ғафуров нақшаи даъвати тирамоҳӣ ба хизмати ҳатмии ҳарбиро пурра иҷро намуданд.
Масъулини вобастагардидаи даъват дар шаҳру ноҳияҳои тобеи ҷумҳурӣ низ дар давраи сипаригардида нақшаи пешбинигардидаро беш аз 97 фоиз иҷро карданд. Аз маҷмӯи шаҳру ноҳияҳои тобеи ҷумҳурӣ, шаҳру ноҳияҳои Сангвор, Нуробод, Рашт, Тоҷикобод, Лахш, Роғун Файзобод, Турсунзода, Ҳисор ва Варзоб иҷрои нақшаро ба пуррагӣ таъмин намуданд.
Аз оғози даъвати тирамоҳии шаҳрвандон ба хизмати ҳатмии ҳарбӣ нақшаи даъват дар қаламрави ҷумҳурӣ зиёда аз 98 фоиз иҷро шуд.
Раёсати иттилоот ва робита бо ҷомеаи
Вазорати мудофиаи Ҷумҳурии Тоҷикистон
