Дар шаҳри Самарқанди Ҷумҳурии Ӯзбекистон ҷаласаи Пленуми чордаҳуми Шӯрои марказии Ҷамъияти ихтиёрии мусоидат ба артиш, авиатсия ва флоти Иттиҳоди Давлатҳои Мустақил ва анҷумани чоруми ғайринавбатии он баргузор шуд. Дар он ҳайатҳои расмии ҷумҳуриҳои Тоҷикистон, Ӯзбекистон, Беларус, Қирғизистон ва Федератсияи Россия иштирок намуданд.
Иштирокдорони муҳтаво ва самтҳои асосии кори тарбияи ҳарбӣ-ватандӯстии ҷавононро бо назардошти таҷрибаи Ҷумҳурии Ӯзбекистон, масъалаҳои гуногунии шаклҳо ва усулҳои пурсамари омодасозии мутахассисон барои сохторҳои қудратӣ ва хоҷагии халқро муҳокима намуданд.
Зимни кори ҷаласа нақши муҳими созмонҳои мудофиавӣ ва варзишӣ-техникӣ дар тайёр кардани мутахассисони техникии баландтаҷриба барои Қувваҳои Мусаллаҳ махсус таъкид шуд. Имрӯз вазифаи асосӣ-ин мукаммал намудани заминаи моддӣ-техникӣ, рушди намудҳои варзиши ҳарбӣ-амалӣ ва омода сохтани варзишгарони бомаҳорат ба шумор меравад.
Таъкид шуд, ки дар шароити имрӯза зарур аст, дар ҳамбастагӣ фаъолият намуда, шаклҳои навро барои вусъати ҳамгироӣ ва робитаи барои тарафайн судманд дарёфт кард. Масъалаи тарбияи ватандӯстии ҷавонон барои ҳамаи созмонҳои мудофиавии ИДМ муҳим аст. Дар назди сохторҳои ҳарбӣ ва созмонҳои мудофиавӣ вазифаҳои нав истодаанд.
Зимни ин ҷаласа натиҷаҳои фаъолияти созмонҳои мудофиавии ИДМ дар самти таҷлил аз 80-солагии Ғалаба, инчунин омодагӣ ба таҷлили 100 солагии таъсисёбии ДОСААФ – и ИДМ дар соли 2027 баррасӣ гардиданд.
Ҳайати Ҷумҳурии Тоҷикистон таҳти роҳбарии сардори муассисаи давлатии «Мададгори мудофиа»-и Вазорати мудофиаи Ҷумҳурии Тоҷикистон генерал-майор Абдулмумин Давлатзода дар ин ҷаласа ширкат намуд.
Дар ин ҷаласа раиси ДОСААФ-и Федератсияи Россия Денис Добряков раиси Шӯрои Марказии ДОСААФ-и Иттиҳидои Давлатҳои Мустақил интихоб гардид.
Тӯли солҳои охир ҷамъиятҳои мудофиавии ИДМ сохтори худро такмил дода, дар асосҳои дуҷониба ва бисёрҷониба фаъолона ҳамкорӣ мекунанд. Имрӯз дар сафҳои худ созмонҳои мудофиавии ИДМ зиёда аз 9 миллион нафарро муттаҳид мекунад. Шӯрои Марказии ДОСААФ-и ИДМ ба кишварҳо аъзо ҷиҳати ҳалли масъалаҳои тарбияи ҳарбӣ-ватандӯстӣ, тайёр намудани шаҳрвандон ба аз рӯйи тахассусҳои ҳарбӣ барои хизмати низомӣ дар сохторҳои миллии қудратӣ, таълим додани касбҳои оммавӣ-техникӣ, ҷалби ҷавонон ба эҷоди техникӣ ва машғулиятҳои варзишии авиатсионӣ, техникӣ ва ҳарбӣ-амалӣ кӯмак мерасонад.
Маркази матбуот ва иттилооти
Вазорати мудофиаи Ҷумҳурии Тоҷикистон
