Дар толори Қувваҳои ҳарбӣ-ҳавоӣ ва мудофиаи зидиҳавоии Қувваҳои Мусаллаҳи Ҷумҳурии Тоҷикистон ҳамоиши илмӣ таҳти унвони “Паёми Президенти Ҷумҳурии Тоҷикистон-таҳкимбахши худшиносии миллӣ” баргузор карда шуд.
Дар чорабинии мазкур, ки ҳадаф аз баргузории он шарҳу тавзеҳи Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии кишвар буд, прокурори ҳарбии гарнизони Душанбе, намояндаи Мақомоти иҷроияи ҳокимияти давлатии ноҳияи Рӯдакӣ, масъулини Фонди хайриявии “Музаффар”, собиқадорон, афсарон ва сарбозони Қувваҳои ҳарбӣ-ҳавоӣ ва мудофиаи зидиҳавоӣ ширкат варзиданд.
Иштирокчиён зимни баромаду суханрониҳои худ дар баробари шарҳу тавзеҳи нуктаҳои муҳими дар Паём зикргардида ҳамзамон аз ҳар афсару сарбоз даъват ба амал оварданд, ки баҳри пойдории сулҳу субот ва ваҳдати миллӣ хизмати худро содиқонаву софдилона ва дар руҳияи баланди ватандӯстӣ ба роҳ монанд. Зеро, хизматчиёни ҳарбӣ мавриди таваҷҷуҳу боварӣ ва эътимоди ҳамешагии Роҳбари давлат қарор доранд.
Ин нукта зимни Паёми навбатии Пешвои миллат муҳтарам Эмомалӣ Раҳмон, ки 17 декабри соли равон ироа гардид, хуб дарҷ гардидааст. “Таъмин будани амнияти ҷомеа, суботи сиёсӣ, сулҳу ваҳдат ва волоияти қонун кафолати рушди устувори иқтисодиву иҷтимоӣ ва баланд гардидани сатҳу сифати зиндагии мардуми кишвар мебошад. Маҳз сулҳу субот, амнияту осоиш ва волоияти қонун имкон дод, ки мо рушди босуръати иқтисодиву иҷтимоӣ ва фарҳангиву сиёсии кишварро таъмин карда, сатҳи некуаҳволии халқро баланд бардорем. Агар дар ҷомеа ваҳдату ҳамдигарфаҳмӣ, сулҳу суботи устувор ва волоияти қонун набошад, мо ба ягон ҳадафи неки худ намерасем ва ягон нақшаи мо амалӣ намегардад. Инро бояд хурду бузурги мамлакат дар хотир дошта бошанд. Бинобар ин, сохторҳои низомӣ ва мақомоти ҳифзи ҳуқуқ бояд вазифаи худро дар самти ҳимояи суботу оромии ҷомеа, амнияту осоиши давлат ва мардуми Тоҷикистон бо садоқат ба давлат ва халқи кишвар таъмин намоянд”.
Дар ҷараёни ҳамоиш ҳунармандони ансамбли “Шараф”-и Вазорати мудофиаи кишвар бо сурудҳои ватандӯстона табъи ҳозиринро болида сохтанд ва ҳамзамон ба иштирокчиёни фаъол сипоснома ва ба собиқадорону сарбозони ятими кул туҳфаҳои солинавӣ тақдим карда шуд.
Шоҳин ШАРИФЗОДА,
лейтенанти хурд
