Парчам муҳимтарин рамзу аркони давлатдорӣ буда, тибқи сарчашмаҳои таърихӣ яке аз парчамдорони нахустини халқи мо Коваи оҳангар мебошад, ки барои барҳам задани пояи ҷабру бедодгарӣ ва ба даст овардани озодиву истиқлол талошу мубориза бурдааст. Дар шоҳасари безаволи Ҳаким Абдулқосим Фирдавсӣ-“Шоҳнома”, Байрақ бо номҳои гуногуни ливо, парчам ва дирафши ковиён тавсиф гардида, нигоҳ доштан дар сафи пеши лашкар ва баланд бардоштани он аз ҷониби паҳлавонону сипоҳиён бошад, тибқи ин асар ва дигар сарчашмаҳои таърихӣ ҳанӯз аз замонҳои қадим ва дар давраҳои пурҳаводис то ба аҳди мо омада расидааст.
Хушбахтона, то имрӯз мардуми тоҷик, алалхусус низомиёни кишвар ин муқаддасоти миллиро гиромӣ дошта, ҳангоми музаффарияту муваффақиятҳои хеш таҳти навои Суруди миллӣ, Парчами миллии худро низ баланд парафшон менамоянд. Хизматчиёни ҳарбии Артиши миллии мамлакат ҳамчун ҳомиёну ҳимоятгарони марзу буми аҷдодӣ, арҷгузорӣ ба муқаддасоти милливу давлатиро аз вазифаҳои муҳиму аввалиндараҷаи худ дониста, савганди садоқату вафодории худро назди халқу Ватан зери Парчами давлатӣ ва Байрақи ҷангии қисми ҳарбии хеш ёд менамоянд. Аз ҷумла, зимни оғози Парадҳои низомӣ, маросими савгандёдкуни хизматчиёни ҳарбӣ ва дигар чорабиниву ҷамъомадҳои тантанавори низомиён, нахуст Парчами давлатии Ҷумҳурии Тоҷикистон ва Байрақи ҷангии қисму воҳидҳои низомӣ ба майдон ворид карда шуда, ҳамчунин дар як вақт бо садо додани Суруди миллӣ ва баланд бардоштани Парчами давлатӣ, ба баргузории машқҳои муштараки низомӣ ва дигар чорабиниҳои ҳарбӣ-сиёсӣ низ оғози расмӣ бахшида мешавад. Дар воқеъ, Парчами давлатӣ чун дигар рамзҳои хоси даватдорӣ аз пурарзиштарин муқаддасоти миллӣ маҳсуб меёбад, ки шаҳомати ворид намудани он ба майдон ва ҷилваву парафшониҳояш, ғуруру ифтихор ва эҳсоси ватандӯстии ҳар як фарди меҳанро бедор менамояд.
Дар баробари Парчами давлатӣ, ҳамчунин хизматчиёни ҳарбии Қувваҳои Мусаллаҳ, Байрақи ҷангии қисму воҳидҳои ҳарбии худро низ ҳифзу гиромӣ медоранд. Маврид ба зикри хос аст, ки Байрақи ҷангӣ ҳамчун рамзи ифтихор аз хизмати ҳарбӣ, шуҷоат, шаъну шараф ва садоқату сарсупурдагии афсарону сарбозон дар ин роҳ, ба полкҳо, (баталёни алоҳида), дивизонҳо, эскадриляҳои ҳавоӣ, қисмҳои таълимӣ ва муассисаҳои ҳарбию таълимӣ супорида мешавад. Байрақи ҷангии қисмҳои ҳарбӣ дар тамоми давраи мавҷудият, сарфи назар аз тағйири ному рақам, дар пойгоҳи он воҳиди низомӣ нигоҳ дошта шуда, тағйири ном ва рақами қисми ҳарбӣ ба сипосномаи Президенти Ҷумҳури Тоҷикистон, ки ҳангомои супурдани байрақ тақдим мегардад, ворид карда мешавад.
Ин парчами ифтихорӣ ҳамроҳи қисми ҳарбии марбуташ нигоҳ дошта шуда, дар замони ҷанг бошад, дар майдон ё худ макони амалиёти ҷангии қисми ҳарбӣ қарор дода мешавад. Барои муҳофизати байрақи ҷангӣ дар ҳолатҳои махсуси ҳарбӣ ва дар ин замина таъмин намудани амну суботи сартосарӣ, тамоми хизматчиёни ҳарбӣ вазифадоранд, ки фидокорона ва мардонавор адои хизмати бар ӯҳда доштаашонро намоянд. Вобаста ба сохт ва тарҳу нигориши Байрақи ҷангии қисму воҳидҳои низомии Артиши миллии Тоҷикистон ҳаминро бояд қайд кард, ки он аз ранги сурх, ки хос ба қаҳрамониву сарбаландӣ ва рӯйсурхии хизматчиёни ҳарбӣ мебошад, иборат буда, ҳамчун муқаддасоти миллӣ дар ҷойҳои муайяншудаи қисму воҳидҳои низомӣ нигоҳ дошта мешавад.
Боқӣ ШАРИФОВ
майор
