Дар Донишкадаи ҳарбии Вазорати мудофиа бахшида ба Рӯзи Парчами давлатӣ Конференсияи ҷумҳуриявии илмӣ-назариявӣ таҳти унвони “Парчами имрӯзаи давлат — таҷассумгари асосҳои таърихӣ ва рамзҳои давлатдорӣ аст”, баргузор гардид. Чорабинии мазкур бо садо додани Суруди миллӣ таҳти навои Оркестри ҳарбӣ-нафасии ин муассисаи таълимии ҳарбӣ оғоз гардид.
Дар конференсия намояндагон аз муассисаҳои олии касбии кишвар иштирок намуда, вобаста ба аҳамияти парчам дар баланд бардоштани ҳисси ватандӯстӣ ва рушди ҷаҳонбинии сиёсиву фарҳангии афсарону омӯзгорон ва курсантони Донишкадаи ҳарбии Вазорати мудофиа маърӯзаҳои илмӣ намуданд.
Роҳбарияти Донишкадаи ҳарбӣ қабл аз оғози суханронӣ нахуст иштирокчиёнро ба ҳозирин муаррифӣ намуда, ҷиҳати иштирок ба онҳо изҳори минатдории самимӣ карданд.
Ҳамин тавр, иштирокчиён ҳар яке дар навбати худ ба сухан баромада, дар мавзӯъҳои “Парчами Ҷумҳурии Тоҷикистон-ифтихори давлату миллат”, “Ойини Парчамдории тоҷикон”, “Таърихи Парчами Ҷумҳурии Тоҷикистон”, “Парчам — рамзи давлатдории тоҷикон”, “30-соли истиқлолу сӣ арзиши парчамдорӣ”, “Таърихи дирафши ковиёнӣ” ва “Парчами давлатӣ — рамзи озодиву соҳибистиқлолии миллат” маърӯзаҳо намудаанд.
Дар ҷараёни конференсия аз ҷониби иштирокчиёни қайд карда шуд, ки Парчами давлатии Ҷумҳурии Тоҷикистон рамзи истиқлолияти давлатии Ҷумҳурии Тоҷикистон буда, таҷҷасумгари таърих, фарҳанг ва арзишҳои миллии халқамон мебошад.
Ин нукта қобили зикр аст, ки конференсияи мазкур пеш аз ҳама ба ифтихори Рӯзи Парчами давлатии Ҷумҳурии Тоҷикистон, дар доираи нақшаи баргузории чорабиниҳои илмӣ ва илмию техникӣ дар мамлакат барои соли 2022 ва дар асоси нақшаи чорабиниҳои илмии Донишкадаи ҳарбии Вазорати мудофиаи кишвар баргузор гардид.
Дар фарҷоми конференсия як қатор устодон ва ҳайати иштирокчиён аз ҷониби раёсати Донишкадаи ҳарбӣ бо сипосномаҳо қадрдонӣ гардиданд ва чорабинӣ бо садо додани Суруди миллӣ анҷом ёфт.
Сафарбег СИРОҶЗОДА
