Дар фазои тантанавӣ ва рӯҳияи баланди ватандӯстӣ дар пойгоҳи яке аз қисмҳои ҳарбии Вазорати мудофиа, фестивал — озмуни фарҳангии «Суруди сарбоз» миёни сарбозону сержантони қисмҳои ҳарбӣ ва донишҷӯёни муассисаҳои таълимии низомӣ оғоз гардид.
Чорабинии мазкур ба муносибати 33-юмин солгарди таъасисёбии Қувваҳои мусаллаҳи Ҷумҳурии Тоҷикистон ташкилу ба роҳ монда шуда, ҳадафи асосии он таҳкими арзишҳои миллӣ, боло бурдани ҳисси худшиносӣ, инчунин рушду дастгирии истеъдодҳои эҷодии ҳайати шахсии Қувваҳои Мусаллаҳи кишвар арзёбӣ мегардад.
Дар доираи фестивал иштирокчиён аз рӯйи як қатор шартҳои муайяншуда маҳорати худро нишон доданд. Аз ҷумла, хори умумӣ, хониши бадеӣ, қироати шеър, сурудҳои ватандӯстона, тақлидкорӣ, навозиши асбобҳои мусиқӣ ва намоиши саҳначаҳои ҳаҷвӣ пешкаши тамошобинон ва ҳайати ҳакамон гардонида шуд.
Дар ҳошияи чорабинӣ намоиши суратҳо ва овезањои деворӣ ташкил карда шуд, ки мазмуни онњо фаъолияти хизматӣ, дастовардҳо ва ҳаёти ҳаррӯзаи афсарону сарбозонро дар бар мегирифт.
Чунин фестивал — озмунҳои фарҳангӣ дар таҳкими рӯҳияи хизматӣ, густариши ҷаҳонбинии маънавӣ ва боло бурдани сатҳи фарҳангии ҳайати шахсӣ нақши муассир доранд.
Қобили қайд аст, ки фестиавл – озмуни “Суруди сарбоз” аз 10 то 14 уми феврали соли ҷорӣ бо ҷалби дастаҳои ҳаваскори қисму воҳидҳои ҳарбӣ дар ҳудуди ҳама гарнизонҳои ҷумҳурӣ доир гардида, зимни ҷамъбасти он беҳтарин иштирокчиён ва дастаҳо бо ифтихорнома, сипоснома ва дигар туҳфаҳои хотиравии Вазорати мудофиа қадрдонӣ карда мешаванд.
