Аз аввали моҳи январи соли 2022, дар Қувваҳои Мусаллаҳи Ҷумҳурии Тоҷикистон нимсолаи якуми соли хониш оғоз гардид.
Ба ин муносибат, дар толори асосии Вазорати мудофиа бо иштироки сардори Ситоди генералӣ, муовинон ва мушовирони вазири мудофиа, фармондеҳони навъҳои қӯшун, сардорони раёсатҳо, шуъбаю хадамоти 
алоҳидаи Дастгоҳи марказӣ ва Ситоди генералӣ чорабинии тантанавӣ бо садо додани Суруди миллӣ баргузор гардид. Пас аз анҷоми Суруди миллӣ фармоишҳои вазири мудофиа доир ба нимсолаи якуми соли хониш ба ҳайати шахсӣ расонида шуд.
Сардори Ситоди генералии Қувваҳои Мусаллаҳ-муовини якуми вазири мудофиа, генерал-лейтенант Эмомалӣ Собирзода, зимни суханронии хеш доир ба вазъи имрӯзаи ҷаҳони муосир, таҳдиду хатарҳои эҳтимолӣ ва оид ба авзои
мураккаби ҳарбӣ-сиёсии минтақа суханронӣ карда, иброз дошт, ки ҳайати роҳбариву фармондеҳии сатҳу зинаҳои гуногунро зарур аст, дар чунин шароити пуртазод барномаҳои таълимӣ ва мавзуъҳои ба давраи таҳсил пешбинигардидаро зери назорати қатъӣ гирифта, донишҳои соҳавии ҳайати шахсиро боз ҳам тақвият бахшанд ва бо масъулияти касбиву вазифавӣ дар самти баланд бардоштани иқтидори мудофиавии кишвар доимо саҳмгузор бошанд.
Гуфта мешавад, ҳамин гуна чорабиниҳо дар тамоми ҷузъу томи Қувваҳои Мусаллаҳ дар сатҳи зарурӣ баргузор гардида, хизматчиёни ҳарбӣ дар доираи дастуру нақшаҳои таҳиягардида ба ин даври таҳсил, дар нуқтаҳои таълимӣ ба дарсҳо аз фанҳои тахассусӣ ва омӯзиш дар машғулиятҳои муайяншуда ҷалб гардиданд.
Маврид ба зикри хос аст, ки ҳамасола дар Қувваҳои Мусаллаҳи кишвар ду давраи хониш доир мегардад. Нимсолаи якуми соли хониш аз моҳи январ оғоз гардида, то моҳи июн идома меёбад, нимсолаи дуюм бошад, аз моҳи июл то моҳи ноябр давом дода мешавад. Дар ҳарду давраи соли хониш, як моҳ таътил дода мешавад, ки дар ин давра, хизматчиёни ҳарбӣ баҳри омода намудани синфхонаҳои таълимӣ, майдончаҳои тактикӣ, муҳандисию сафороӣ, варзишӣ ва умуман, барои пурра мутобиқ намудани пойгоҳҳои моддиву таълимӣ машғул мешаванд.
Азимҷон БАДАЛОВ,
капитан
