20 октябр дар тамрингоҳи Фахрободи гарнизони Хатлон маросими ифтитоҳи машқҳои муштарак бо нерӯҳои сулҳҷӯёнаи кишварҳои Созмони Аҳдномаи Амнияти Дастаҷамъӣ таҳти унвони “Бародарии шикастнопазир-2025” ва тамринҳои махсуси ҷузъу томи ҳифзи радиатсионӣ, кимиёвӣ, биологӣ ва ёрии тиббии СААД “Монеа-2025” баргузор гардид.
Дар маросими ифтитоҳи машқҳо, сардори Ситоди генералии Қувваҳои Мусаллаҳ, муовини якуми вазири мудофиаи Ҷумҳурии Тоҷикистон, генерал-лейтенант Бобоҷон Саидзода, дабири кулли Созмони Аҳдномаи Амнияти Дастаҷамъӣ Имангалӣ Тасмагамбетов, сардори ситоди муштараки Созмони Аҳдномаи Амнияти Дастаҷамъӣ, генерал-полковник Андрей Сердюков, намояндагони нерӯҳои мусаллаҳи ҷумҳуриҳои Белорус, Қазоқистон, Қирғизистон, Русия, Тоҷикистон ва дигар шахсони расмӣ ширкат доштанд.
Ҷамъомади тантанвӣ бо садо додани сурудҳои миллии давлатҳо таҳти навои оркестри ҳарбӣ-нафасӣ ва барафрохта шудани парчамҳои давлатии кишварҳои узви СААД дар майдони баргузории размоишҳои муштарак оғоз гардид.
Зимни ифтитоҳи маросими расмии машқҳо, вобаста ба сиёсати сулҳҷӯёнаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва ҳамкориву ҳамгироии Ҳукумати мамлакат бо кишварҳои шарику ҳампаймон, созмонҳои бонуфузи минтақавию байналмилалӣ сардори Ситоди генералии Қувваҳои Мусаллаҳ- муовини якуми вазири мудофиаи Ҷумҳурии Тоҷикистон генерал-лейтенант Бобоҷон Саидзода қайд кард, ки «Муқовимати Созмони Аҳдномаи Амнияти Дастаҷамъӣ ба таҳдиду бӯҳронҳои гуногун бо назардошти таҳаввулот ҳамеша дар мадди назари ҳукумати Ҷумҳурии Тоҷикистон ва дигар давлатҳои узв қарор дорад.
Зимни суханронии Дабири кулли Созмони Аҳдномаи Амнияти Дастҷамъӣ Имангали Тасмагамбетов дар назди иштирокчиёни размоишҳои муштарак зикр карда шуд, ки сарони кишварҳои ин созмон ҷиҳати рушди нерӯ ва тавонмандии низоми амнияти дастаҷамъӣ дар мубориза бо таҳдидҳои замон ҳама чораҳои заруриро меандешанд.
Ҳамчунин таъкид гардид, ки машқҳои дарпешистода ба такмили касбияти ҳайати шахсӣ дар омодагӣ ва гузаронидани амалиётҳои сулҳҷӯёна, инчунин баланд бардоштани сатҳи омодагии саҳроӣ ва ҳамоҳангии контингентҳои миллӣ мусоидат хоҳад кард.
Чорабинӣ бо гузашти низомии ҳайати шахсии иштирокчиён дар пойгоҳи багузории машқҳои муштарак ба анҷом расид.
Дар чаҳорчӯби машқҳои навбатӣ бори аввал тамринҳои махсус бо иштироки ҷузъу томи ҳифзи радиатсионӣ, кимиёвӣ, биологӣ ва таъминоти тиббӣ баргузор мегардад, ки ҳадафи аслии он таъмини амнияти биологӣ мебошад.
Дар тамринҳои «Бародарии шикастнопазир-2025» ва «Монеа-2025» контингентҳои низомии Беларус, Қазоқистон, Қирғизистон, Русия, Тоҷикистон, гурӯҳҳои амалиётии Ситоди муштарак ва котиботи Созмони Аҳдномаи Амнияти Дастаҷамъӣ ширкат доранд. Дар тамринҳои мазкур зиёда аз 1500 нафар афсарону сарбозон, беш аз 200 адад техникаҳои ҳарбӣ, мошинҳои махсуси низомӣ, чархболҳои ҷангӣ ва ҳавопаймоҳои бесарнишин ҷалб мегарданд.
Марҳилаҳои фаъоли машқҳои муштараки Қувваҳои Мусаллаҳи давлатҳои аъзои Созмони Аҳдноаи Аамнияти Дастаҷамъӣ дар шакли омехта бо марҳилаи ниҳоии машқҳои муштараки зиддитеррористии мақомоти салоҳиятдори кишварҳои узви Иттиҳоди Давлатҳои Мустақил «Иттиҳоди зиддитеррористии 2025» баргузор мешаванд.
Маркази матбуот ва иттилооти
Вазорати мудофиаи Ҷумҳурии Тоҷикистон
