1-уми апрели соли равон, дар асоси Фармони Президенти Ҷумҳурии Тоҷикистон, муҳтарам Эмомалӣ Раҳмон аз 1-уми марти соли 2023, “Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1996-2005-и Ҷумҳурии Тоҷикистон ба хизмати ҳарбӣ” ва тибқи талаботи Қонуни Ҷумҳурии Тоҷикистон “Дар бораи ӯҳдадории ҳарбӣ ва хизмати ҳарбӣ” дар тамоми шаҳру навоҳии мамлакат даъвати навбатии ҷавонписарон ба сафи Қувваҳои Мусаллаҳи ҷумҳурӣ дар фазои идона оғоз гардид.
Тибқи иттилои расида, имсол шумораи ҷавонони синну соли даъватӣ нисбат ба талаботи Қувваҳои Мусаллаҳ хеле зиёд буда, ин ба масъулини мақомоти вобастаи давлатии даъват имконият медиҳад, ки аз байни онҳо беҳтаринҳо ҷудо карда шаванд. Чунки натиҷаҳои чорабиниҳои даъватӣ ба вазъи омодагии Қувваҳои Мусаллаҳ таъсири бевосита мерасонад. Аз ин сабаб, масъулини даъват вазифадор гардидаанд, ки танҳо ҷавонони солиму бардам ва болаёқатро даъват, интихоб ва ба сафи Қувваҳои Мусаллаҳ гусел намоянд.
Ин нуқта қобили таваҷҷуҳ аст, ки тайи солҳои охир шумораи ҷавонписарони ихтиёрӣ ба сафи Артиши миллӣ афзун гардида, шаҳрвандон баъди гирифтани аввалин даъватнома, ба комиссияҳои даъватӣ ҳозир мешаванд. Ин аз он шаҳодат медиҳад, ки масъулини мақомоти вобастаи ин чорабинии муҳими сиёсӣ, аз як мавсим то мавсими даъвати дигар, мувофиқ ба талаботи моддаи 28-и Қонуни Ҷумҳурии Тоҷикистон “Дар бораи ӯҳдадории ҳарбӣ ва хизмати ҳарбӣ”, ки гузаронидани омӯзиши пешаздаъватӣ ва омода намудани шаҳрвандони синни даъватиро барои адои хизмати ҳарбӣ дар сафҳои Қувваҳои Мусаллаҳ дар бар мегирад, корҳои зиёдеро амалӣ намуда, захираи даъватшавандагонро дар вилоятҳо ва шаҳру ноҳияҳои ҷумҳурӣ муайян ва мушаххас намудаанд.
Илова бар ин, дар ҳамаи комиссариатҳои ҳарбии вилоятҳо ва шаҳру ноҳияҳои мамлакат, аз ҳисоби масъулини бахшу шӯъбаҳои вобастаи мақомоти иҷроияи ҳокимияти давлатӣ, комиссияҳои даъватӣ таъсис дода шудаанд, ки аъзоёни вобасташудаи ин маъракаи муҳими сиёсӣ, бо дарки масъулияти баланд, даъвату гусели шаҳрвандонро ба хизмати ҳатмии ҳарбӣ муташаккилона ба роҳ мондаанд.
Мавриди ба зикр аст, ки ҳамасола дар Ҷумҳурии Тоҷикистон даъвату гусели шаҳрвандони ҷинси марди аз 18 то 27-сола ба хизмати ҳатмии ҳарбӣ дар ду мавсим баргузор карда мешаванд. Аз ҷумла, даъвати баҳории шаҳрвандон ба сафи Қувваҳои Мусаллаҳ аз якуми апрел оғоз гардида, он то охири моҳи май идома меёбад ва даъвати тирамоҳӣ бошад, аз аввали моҳи октябр шурӯъ гардида, дар охири моҳи ноябр ба анҷом мерасад.
Қобили зикр аст, ки имрӯзҳо дар баробари даъвату гусели шаҳрвандон ба хизмати ҳарбӣ, ҳамзамон сарбозоне, ки муҳлати муқаррагардидаи хизмати ҳарбиро дар қисмҳои низомии сохторҳои қудратии мамлакат ва мақомоти ҳифзи ҳуқуқи кишвар ба итмом расонидаанд, дар давоми моҳҳои апрел ва майи соли равон, марҳила ба марҳила, аз сафи Қувваҳои Мусаллаҳ ба эҳтиёт рухсат карда мешаванд.
Маркази матбуоти
Вазорати мудофиаи
Ҷумҳурии Тоҷикистон
