Бо оғоз гардидани даъвати тирамоҳии шаҳрвандони ҷинси марди аз 18 то 27-солаи Ҷумҳурии Тоҷикистон ба хизмати ҳатмии ҳарбӣ дар мамлакат, чун анъанаи доимӣ дар нахустин рӯзи даъвати тирамоҳии соли равон аввалин шуда, Комиссариати ҳарбии шаҳри Хоруғ, ноҳияҳои Дарвоз, Мурғоб, Рӯшон, Шуғнони Вилояти мухтори кӯҳистони Бадахшон ва ноҳияи Сангвор аз иҷрои пурраи нақшаи ба худ пешбинигардида гузориш доданд.
Ҳамин тавр, вобаста ба татбиқи амалии Фармони Президенти Ҷумҳурии Тоҷикистон муҳтарам Эмомалӣ Раҳмон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1994-2003-юми Ҷумҳурии Тоҷикистон ба хизмати ҳарбӣ, комиссияҳои даъватӣ ташкил карда шуда, пас аз гузаштан аз муоинаи тиббӣ, дар доираи чорабиниҳои даъватӣ бо иштироки даъватшавандагон, волидону пайвандони онҳо ва масъулини мақомоти вобастаи давлатии даъват дар шаҳри Душанбе, вилоятҳои Бадахшону Хатлон
, шаҳру ноҳияҳои тобеи ҷумҳурӣ ва дигар шаҳру навоҳии мамлакат чорабиниҳои бошукуҳу тантанавӣ бахшида ба “Рӯзи даъватшаванда” ташкилу ба роҳ монда шуд.
Зимни баргузории ин гуна ҷамъомадҳо дар ҳамаи гӯшаву канори ҷумҳурӣ, масъулини мақомоти вобастаи давлатии даъват ва дигар шахсони расмӣ дар назди ҳозирин баромад намуда, ҷавонписароне, ки дар рӯзҳои таҷлил аз ҷашни бузурги миллиамон-30-юмин солгарди Истиқлоли давлатӣ ба хизмати ҳарбӣ мераванд, ин санаи муҳими таърихиро лаҳзаи фаромӯшнопазири ҳаёташон арзёбӣ карданд ва ба хизмати шарафмандонаи онҳо дар сафи Қувваҳои Мусаллаҳ, мудофиаи марзу буми Ватан ва ҳифзи дастовардҳои беназирӣ даврони соҳибистиқлолии кишвар, барору комёбиҳо таманно намуданд.
Сокинони худогоҳу хештаншиноси шаҳру ноҳияҳои ҷумҳурӣ ва волидони сарбозони ояндаи Ватан низ, даъват гардидани фарзандони худро дар ин рӯзҳои таърихии ҷашни соҳибихтиёриву давлатдории мустақили миллӣ ба хизмати ҳарбӣ, аз лаҳзаҳои фаромӯшнопазири ҳаёти ин гурӯҳи ҷавонони хушбахту нектолеъ маънидод намуда, хизмати онҳоро дар роҳи дифоъ аз марзи муқаддаси Ватан ва таъмини амнияту суботи ин сарзамини аҷдодӣ беҳтарин шараф ва номи неку сарбаландии ҷавонмардона арзёбӣ карданд.
Боқӣ Шарифзода,
хабарнигори ҳарбӣ
