1-уми апрели соли равон, дар асоси Фармони Президенти Ҷумҳурии Тоҷикистон, муҳтарам Эмомалӣ Раҳмон аз 19-уми феврали соли 2025, “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1998-2007-и Ҷумҳурии Тоҷикистон ба хизмати ҳарбӣ” ва дар асоси талаботи Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” дар тамоми шаҳру навоҳии мамлакат даъвати навбатии ҷавонписарон ба сафи ҷузъу томи Артиши миллии мамлакат дар фазои идона оғоз гардид.
Илова бар ин, дар ҳамаи комиссариатҳои ҳарбии вилоятҳо ва шаҳру ноҳияҳои мамлакат, аз ҳисоби масъулини бахшу шуъбаҳои вобастаи мақомоти иҷроияи ҳокимияти давлатӣ, комиссияҳои даъватӣ таъсис дода шудаанд, ки аъзоёни вобасташудаи ин маъракаи муҳими сиёсӣ бо дарки масъулияти баланд даъвату гусели шаҳрвандонро ба хизмати ҳатмии ҳарбӣ муташаккилона ба роҳ мондаанд.
Ҳамзамон, дар ин рӯз бо ҷалби навдаъватшавандагони ноҳияҳои Исмоили Сомонӣ, Шоҳмансур, Фирдавсӣ ва Синои пойтахт низ дар Муассисаи давлатии “Амфитеатр”-и шаҳри Душанбе чорабинии “Рӯзи даъватшаванда” бо шукӯҳу шаҳомати хоса доир карда шуд. Дар чорабинии мазкур муовини раиси шаҳри Душанбе, сардори Ситоди генералии Қувваҳои Мусаллаҳ-муовини якуми вазири мудофиа, раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дигар шахсони расмӣ иштирок ва суханронӣ намуданд.
Иштирокчиён зимни суханронии худ ба тамоми навдаъватшавандагон ва волидайни онҳо изҳори сипосу миннатдорӣ баён намуда, қайд карданд, ки ин ташаббуси ҷавонони собитқадам нишонаи баланди эҳтиром ба ин миллату ин сарзамин аст.
Дар ҷараёни чорабинӣ ба навдаъватшавандагоне, ки курси кӯтоҳмуддати ронандагиро дар Муассисаи давлатии “Мададгори мудофиа” хатм намудаанд, шаҳодатномаи ронандагӣ тақдим карда шуд.
Дар идома, барои баланд бардоштани рӯҳияи навдаъватшавандагон, волидайни онҳо ва аҳли нишаст аз ҷониби ҳунармандони бахши фарҳанги пойтахт чорабинии консертӣ доир карда шуд.
Бояд қайд намуд, ки ҳамасола дар Ҷумҳурии Тоҷикистон даъвату гусели шаҳрвандони ҷинси марди аз 18 то 27-сола ба хизмати ҳатмии ҳарбӣ дар ду мавсим баргузор карда мешаванд. Аз ҷумла, даъвати баҳории шаҳрвандон ба сафи Қувваҳои Мусаллаҳ аз якуми апрел оғоз гардида, он то охири моҳи май идома меёбад ва даъвати тирамоҳӣ бошад, аз аввали моҳи октябр шурӯъ гардида, дар охири моҳи ноябр ба анҷом мерасад.
Қобили зикр аст, ки имрӯзҳо дар баробари даъвату гусели шаҳрвандон ба хизмати ҳарбӣ, ҳамзамон сарбозоне, ки муҳлати муқарраргардидаи хизмати ҳарбиро дар қисмҳои низомии сохторҳои қудратии мамлакат ва мақомоти ҳифзи ҳуқуқи кишвар ба итмом расонидаанд, дар давоми моҳҳои апрел ва майи соли равон, марҳила ба марҳила, аз сафи Қувваҳои Мусаллаҳ ба эҳтиёт рухсат карда мешаванд.
Маркази матбуот ва иттилооти
Вазорати мудофиаи Ҷумҳурии Тоҷикистон
