« 1 » апрели соли 2021
ФИШУРДАИ МАТБУОТӢ
Имрӯз дар доираи қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” ва тибқи талаботи фармони Президенти Ҷумҳурии Тоҷикистон муҳтарам Эмомалӣ Раҳмон “Дар бораи ба эҳтиёт рухсат додани хизматчиёни ҳарбие, ки муҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1994-2003 Ҷумҳурии Тоҷикистон ба хизмати ҳарбӣ” дар тамоми шаҳру ноҳияҳои мамлакат даъвату гусели шаҳрвандон ба хизмати ҳатмии ҳарбӣ муташакилона ҷараён дорад.
Бояд тазаккур дод, ки ҳамасола дар Ҷумҳурии Тоҷикистон даъвату гусели шаҳрвандони ҷинси марди аз 18 то 27 сола, ба хизмати ҳатмии ҳарбӣ дар ду мавсим баргузор карда мешавад. Яъне даъвати баҳории шаҳрвандон ба сафи Қувваҳои Мусаллаҳ аз якуми апрел оғоз гардида, он то охири моҳи май идома меёбад ва даъвати тирамоҳӣ бошад, аз аввали моҳи октябр шурӯъ гардида дар охири моҳи ноябр ба анҷом мерасад.
Қобили зикр аст, ки дар Ҷумҳурии Тоҷикистон беш аз 400 ҳазор нафар ҷавонписарони синни даъватӣ, яъне аз 18 то 27 ба қайд гирифта шудаанд, ки аз ин шумора фоизи хеле кам ба сафи Қувваҳои Мусаллаҳ даъват карда мешаванд. Ва ин теъдод албатта ба сифати даъват таъсири мусбӣ расонида, имконият медиҳад, ки аз миёни ҳама табақаҳои аҳолии кишвар ҷавонписарони солиму бардам ва болаёқат интихоб ва ба сафи Артиши миллии мамлакат фиристода шаванд.
Барои маълумот хотирасон мекунем, ки дар даъвати тирамоҳии соли 2020 масъулини мақомоти вобастаи давлатии бисёре аз шаҳру ноҳияҳои ҷумҳурӣ фаъолияти назаррас нишон дода, ин чорабинии муҳими сиёсиро пеш аз муҳлат, яъне 6 ноябр пурра ба анҷом расониданд. Ва дар ин самт саҳми масъулини мақомоти иҷроияи ҳокимияти давлатии шаҳру ноҳияҳои мамлакат ва иқдому ташаббусҳои волидони ҷавонписарон, ки фарзандони хешро ихтиёрӣ ба комиссияҳои даъватӣ ҳозир намуданд, шоистаи таҳсин мебошад.
