Аз аввали моҳи январи соли 2025 дар Қувваҳои Мусаллаҳи Ҷумҳурии Тоҷикистон даври якуми омӯзишӣ оғоз ёфт. Ба ин муносибат, дар Вазорати мудофиаи мамлакат, раёсатҳои навъи қӯшунҳои Қувваҳои Мусаллаҳ, қисму воҳидҳои алоҳидаи низомӣ ва дар тамоми ҷузъу томи Артиши миллии ҷумҳурӣ ҷамъомаду машғулиятҳои тантанавӣ баргузор гардиданд.
Аз ҷумла, имрӯз дар толори асосии Вазорати мудофиаи мамлакат, чун ба мисли дигар сохторҳои зертобеи он ҷамъомади тантанавӣ бо садои Суруди миллӣ, баромади ҳайатҳои роҳбарӣ ва ба самъи ҳозирин расонидани нақша-чорабиниҳо ва талаботи фармоиши вазири мудофиа вобаста ба ташкилу баргузории даври якуми омӯзишӣ дар Қувваҳои Мусаллаҳ ҷараён гирифт.
Сардори Ситоди генералии Қувваҳои Мусаллаҳ-муовини якуми вазири мудофиа генерал-лейтенант Эмомалӣ Собирзода зимни баромади худ доир ба дастуру супоришҳои Сарфармондеҳи Олии Қувваҳои Мусаллаҳ, генерали артиш муҳтарам Эмомалӣ Раҳмон, натиҷагирӣ аз даври дуюми омӯзишӣ ва оид ба ҳадафу моҳияти мавзуъҳои ба машғулиятҳои даври якуми омӯзишӣ пешбинигардида, изҳори назар кард ва аз хизматчиёни ҳарбии ҳама зинаҳо муносибати ҷиддиро дар самти омӯзишу аз бар намудани таълимоти ин давр талаб намуд. Ӯ аз ҷумла қайд кард, ки вазъи ноустувору зудтағийрёбандаи ҷаҳони муосир имрӯз аз ҳар як хизматчии ҳарбӣ омодабошии доимии ҷангӣ, ҳушёриву зиракӣ ва масъулияти баланду муносибати ҷиддиро дар самти иҷрои вазифаву уҳдадориҳои хизматӣ тақозо мекунад. Зеро, тақвият бахшидани тамоми самту соҳаҳои Қувваҳои Мусаллаҳ ба баланд гардидани иқтидори мудофиавии кишвар таъсири бевосита мерасонад.
Сипас, аз ҷониби масъулини раёсатҳои дахлдори ин ниҳоди қудратӣ фармоиши вазири мудофиа дар бораи ташкили тайёрии ҷангӣ, тайёрии ҷамъиятӣ-давлатӣ ва таъсис додани гурӯҳҳои таълимӣ барои нимсолаи якуми соли таҳсили 2025 расонида шуд.
Қобили зикр аст, ки ба ҷамъомаду машғулиятҳои даври якуми омӯзишӣ муовинони вазири мудофиа, фармондеҳони навъи қӯшунҳо, сардорон ва ҳайати шахсии раёсату шуъбаҳо ва хадамотҳои алоҳидаи Дастгоҳи марказии Вазорати мудофиа, Ситоди генералии Қувваҳои Мусаллаҳ, комиссарони ҳарбӣ, командирони қисмҳои низомӣ, афсарону сарбозон ва дар маҷмуъ хизматчиёни ҳарбии ҳама сатҳу зинаҳои Артиши миллӣ ҷалб карда мешаванд.
Чунин чорабиниҳои тантанавӣ ҳамзамон аввали моҳи январи соли 2025 дар пойгоҳи тамоми қисму воҳидҳои низомӣ ва ҷузъу томи тобеи навъи қӯшунҳои Қувваҳои Мусаллаҳи ҷумҳурӣ низ бо ташкили ҷамъомаду машғулиятҳои дарсӣ, намоиши нуқтаҳои муҷаҳҳази таълимӣ, ки барои нимсолаи якуми омӯзишӣ пешбинӣ шудааст, дар сатҳи зарурӣ ба роҳ монда шуданд.
Барои маълумот хотиррасон мекунем, ки ҳамасола дар Қувваҳои Мусаллаҳи Ҷумҳурии Тоҷикистон ду давраи омӯзишӣ пешбинӣ гардидааст, ки яке аз аввали моҳи январ оғоз гардида, то охири моҳи май идома меёбад ва дуюмин бошад, аз якуми июл шурӯъ гардида, дар даҳаи сеюми моҳи ноябр ҷамбасту натиҷагирӣ карда мешавад. Рафти машғулиятҳои назариявӣ ва ҳам амалии ду давраи омӯзишӣ таҳти назорати роҳбарияти Вазорати мудофиа ҷараён гирифта, зимни ҷамъбаст натиҷаи он таҳлилу баррасӣ ва сатҳи иҷрои талаботи таълимоти давраҳои таҳсил баҳогузорӣ мешаванд.
Фаридун МАҲМАДАЛИЗОДА,
сардори Маркази матбуот ва иттилооти
Вазорати мудофиаи Ҷумҳурии Тоҷикистон,
полковник
