Кормандони мақомоти ҳифзи ҳуқуқ ва дигар сохторҳои қудратӣ, шаҳрвандони дар қайди комиссариати ҳарбӣ қарордошта ва захираҳои сафарбарии шаҳри Ваҳдат дар асоси нақшаи тасдиқгардида бо бонги хатари санҷишӣ бархезонида шуданд.
Нахуст дар ситоди Комиссариати ҳарбии шаҳри Ваҳдат бо иштироки Сардори ситоди генералии Қувваҳои Мусаллаҳ — муовини якуми вазири мудофиаи Ҷумҳурии Тоҷикистон генерал — лейтенант Саидзода Бобоҷон, раиси шаҳри Ваҳдат ва дигар аъзоёни ситоди муттаҳида ҷаласа доир шуд. Зимни он ҳолати омодабошии масъулини минтақаи мудофиаи ҳудудии шаҳри Ваҳдат ва дигар масъалаҳои муҳим мавриди баррасӣ қарор гирифт.
Баъди аз ҷониби Комисарияти ҳарбии шаҳр гирифтани даъватнома беш аз 7 ҳазору 500 нафар сокинони шаҳри Ваҳдат, дар ҷамъомади мудофиаи ҳудудӣ ва санҷиши ҳолати захираҳои сафарбарӣ бо масъулияти баланди шаҳрвандӣ иштирок намуданд.
Ҳамзамон дар ин ҷамъомад, ки ҳадаф аз он ҳимояи манфиатҳои милливу давлатӣ арзёбӣ мешавад, дар нуқтаҳои алоҳида зиёда аз 450 техникаи хоҷагии халқ ҷамъ оварда шуд.
Ҳозиршавии саривақтии шарвандони касбу кори гуногун дар ин чорабинии муҳими сиёсӣ – ҷамъиятӣ аз он шаҳодат медод, ки онҳо бо дарки амиқи авзои ноустувори сиёсии ҷаҳон дар ҳифзи якпорчагии Тоҷикистони озоду соҳибистиқлол ҳамеша омода ҳастанд ва ҷиҳати баланд бардоштани иқтидори мудофиавии давлат саҳми арзишманди худро мегузоранд.
Лозим ба таъкиди хос аст, ки чорабиниҳои мазкур дар асоси дастуру супоришҳои бевоситаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҳамасола ташкилу роҳандозӣ шуда, зимни он аз ҷониби шахсони масъули Вазорати мудофиаи Ҷумҳурии Тоҷикистон ҳолати омодабошии захираҳои сафарбарӣ ва дигар қувваву воситаҳои мудофиаи ҳудудӣ ба пуррагӣ мавриди санҷиш ва таҳлил қарор дода мешавад.
Ҳамин тавр ба як қатор волидайни фаъол барои ширкат дар чунин чорабнии ҳарбӣ-сиёсӣ ва тарбияи дурусти фарзандон дар рӯҳияи ватандӯстиву хештаншносӣ аз номи роҳбарияти Вазорати мудофиа сипоснома тақдим карда шуд.
Гуфтан ба маврид аст, ки дар сатҳи баланди ташкилӣ баргузор шудани чунин чорабиниҳо гувоҳи он аст, ки сокинони шарафманди меҳан ҳифзи сулҳу субот ва осудагии кишварро вазифаи аввалиндараҷаи худ дониста, дар ҳолатҳои зарурӣ ватани азизу маҳбуби худро аз ҳамагуна таҳдиду хатарҳои эҳтимолӣ бо ҷону дил ҳимоят мекунанд.
