Артиш ё худ Қувваҳои Мусаллаҳ, яке аз рукнҳои асосии давлатдорӣ, пояи матин ва кафили бехатарии ҳар як кишвар аст. 23-юми феврали соли равон аз рӯзи таъсисёбии Қувваҳои Мусаллаҳи Ҷумҳурии Тоҷикистон 30 сол пур мешавад.
Нерӯҳои мусаллаҳи Тоҷикистони соҳибистиқлол ҳанӯз аз рӯзҳои нахустини таъсисёбӣ ва дар зарфи 30 соли мавҷудият озмоишҳои ҷиддӣ, пайраҳаи пурпечу тоб ва монеаҳои сахту сангинро пушти сар намуда, дар даврони Истиқлоли давлатӣ ва дар партави таваҷҷӯҳу ғамхориҳои доимии Пешвои миллат, Сарфармондеҳи Олии Қувваҳои Мусаллаҳ, генерали артиш, мӯҳтарам Эмомалӣ Раҳмон ба дастоварду комёбиҳои беназир ноил гардид.
Боиси хушнудиву сарфарозист, ки дар зарфи ин солҳо обрӯю эътибори Артиши миллӣ дар миёни аҳолӣ, ба хусус ҷавонон афзун гашта, мардуми кишвар хизматҳои шабонарўзии афсарону аскарони Қувваҳои Мусаллаҳи меҳанро қадр мекунанд ва аз муҳофизони Ватани хеш ифтихор менамоянд ва ин албатта амали воқеист. Чунки низомиёни мамлакат ҳанӯз аз рӯзҳои таъсисёбии Артиши миллӣ дар таҳким бахшидани сохти кониститутсионӣ дар мамлакат, ҳимояи ҳама дастоварду музаффариятҳои истиқлолият, пойдории сулҳу субот, таъмини ҳаёти осоиштаи мардумони Тоҷикистони азиз ва баланд бардоштани иқтидори мудофиавии кишвар саҳми арзанда гузоштаанд.
Дар даврони Истиқлоли давлатӣ ва бо мақсади арҷгузорӣ нисбат ба хизматҳои шоёни таҳсини афсарону сарбозон, хизматчиёни ҳарбии сатҳу зинаҳои гуногун ва дар маҷмӯъ муҳофизони ин марзу бум, ҳамасола ба муносибати таҷлил аз рӯзи таъсисёбии Қувваҳои Мусаллаҳи ҷумҳурӣ дар қаламрави мамлакат, чорабиниҳои гуногуни сиёсиву низомӣ, фарҳангиву фароғатӣ ва варзишӣ ба нақша гирифта шуда, он дар сатҳи баланд баргузор карда мешаванд.
Имсол низ ҳайатҳои роҳбариву фармондеҳии Вазорати мудофиа, навъи қӯшунҳо, қисму воҳидҳои алоҳидаи низомӣ, муассисаҳои таълимии ҳарбӣ ва ҳама сохторҳои зертобеи ин ниҳоди қудратӣ дар доираи таҳия ва тасдиқи нақша чорабиниҳо ба муносибати 30-солагии Қувваҳои Мусаллаҳи ҷумҳурӣ омодагии ҳамаҷониба дидаанд.
Аз ҷумла, ташкили конфронсҳои илмӣ-амалӣ, озмунҳои фарҳангӣ фароғатӣ, барои хизматҳои арзандаву бенуқсон дар сафи артиш, бо медалу ифтихорномаҳо қадрдонӣ намудани хизматчиёнӣ ҳарбӣ, тақдими рутбаҳои навбатии ҳарбӣ, таҳия ва пешниҳоди барномаҳои консертӣ, намоиши аксу мусаввараҳои таърихӣ, мусобиқаҳои ҳарбӣ-варзишӣ, расонидани кӯмаки моддӣ ба ятимон дар сохторҳои зертобеи Вазорати мудофиаи ҷумҳурӣ, аёдати собиқадорони Қувваҳои Мусаллаҳ, дастгирӣ намудани узви оилаҳои хизматчиёни ҳарбии фавтида, арҷгузорӣ нисбат ба афсарону сарбозони ҳалокгашта ва даҳҳо чорабиниҳои дигарро то рӯзи ҷашн доир намоянд.
Илова бар ин, дар баробари ташкилу баргузории чорабиниҳои фарҳангӣ-фароғатӣ ва варзишӣ, масъулин азм доранд, ки то санаи 23-юми феврал ба муносибати истиқболи сазовор аз 30 солагии Қувваҳои Мусаллаҳ дар ҳудуди ҳама гарнизонҳои ҷумҳурӣ 57 бинову иншооти аҳамияти ҳарбӣ доштаро низ мавриди баҳрабардорӣ қарор диҳанд.
Бояд тазаккур дод, ки ҳайатҳои роҳбариву фармондеҳии Вазорати мудофиа соли сипаригашта, баҳри дар сатҳи баланд истиқбол гирифтани ин ҷашн, шиореро, таҳти унвони “30-солагии Қувваҳои Мусаллаҳи Ҷумҳурии Тоҷикистонро бо омодабошии баланди ҷангӣ, интизоми намунавӣ ва бунёдкориву созандагӣ истиқбол мегирем!” қабул намуда, азм доранд, ки то рӯзи таҷлил аз ин санаи муҳиму таърихӣ ва тибқи нақша-чорабиниҳои тарҳрезигардида давоми соли равон корҳои зиёдеро ба сомон расонанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Чумҳурии Тоҷикистон,
полковник
