Бо оғоз гардидани даъвати баҳории шаҳрвандон ба хизмати ҳарбӣ, имрӯзҳо дар тамоми қисму воҳидҳои низомии кишвар қабулу ҷобаҷокунии наваскарон ва гусели сарбозоне, ки мӯҳлати муқарраргардидаи хизмати ҳарбиро дар сафи Қувваҳои Мусаллаҳ ба анҷом расонидаанд, марҳила ба марҳила идома дорад.
Чорабинии гусели сарбозон аз ҳайати сохторҳои қудратии мамлакат ва қабулу ҷобаҷокунии наваскарон дар қисмҳои ҳарбии Артиши миллӣ тибқи талаботи ойинномаҳои умумиҳарбии Қувваҳои Мусаллаҳ ва низомномаи тартиби адои хизмати ҳарбӣ ба роҳ монда мешаванд.
Албатта, хизмати ҳарбӣ ба худ талабот ва қоидаҳои махсуси муносибату рафтори ойинномавиро дорад, ки ворид гардидан ба қисми низомӣ аз ҳар як ҷавон масъулият ва омӯзишро тақозо мекунад. Афсарони масъули қисмҳои низомӣ наваскаронро зимни шомил шудан ба ҳайати ҷузъу том бо сару либоси низомӣ ва дигар молу амволи шайъӣ таъмин карда, нахуст бо шароитҳои мавҷуда, бинову иншооти ҳарбӣ, таъйиноти самти фаъолияти қисмҳои низомӣ, техникаҳои ҷангӣ ва дигар силоҳу муҳиммоти дар қисми ҳарбӣ буда шинос менамоянд ва ба омӯзиши таълимоти ҳарбӣ фаро мегиранд.
Аз ҷумла гурӯҳи наваскарон, ки айни ҳол рӯзҳои нахустини хизмати ҳарбии худро дар Бригадаи ҳамлаовари десантии Қӯшунҳои зудамали Қувваҳои Мусаллаҳи мамлакат пеш бурда истодаанд, имрӯзҳо дар доираи таълимоти курси кӯтоҳмуддати наваскарӣ ё худ барномаҳои таълимии ҷанговарони ҷавон талабот ва меъёрҳои гуногуни ҳарбиро ба таври назариявӣ аз худ намуда, ӯҳдадориҳои хизматӣ, савганду саломи ҳарбӣ ва дигар нозукиҳое, ки тӯли фаъолияти минбаъда барои сарбозон иҷрои он ҳатмӣ мебошад, сипарӣ мекунанд.
Агарчӣ, дар рӯзҳои аввали хизмат ва давраи курси кӯтоҳмуддати ҳарбии навскарон ба онҳо ягон навъ силоҳи ҷангӣ вобаста нагардад ҳам, вале дар ин давра ба онҳо аз ҷониби афсарони ҷавон шакл, сохт, хислатҳои ҷангии навъи силоҳи оташфишони ҷангӣ, ба қисмҳо ҷудо ва насб намудани он омӯзонида мешавад.
Омӯзишу мавриди истифода қарор додани навъҳои дигари силоҳу муҳиммоти ҳозиразамони низомӣ, роҳу усулҳои мудофиа ва тактикаҳои ҷангӣ бошад, ба сарбозони Артиши ҷавони Тоҷикистон пас аз ёд намудани Савганди ҳарбӣ, дар доираи барномаҳои мукаммали таълимӣ ташкилу ба роҳ монда мешавад.
Машқҳои сафороӣ, ки дар доираи машғулиятҳои амалии курси кӯтоҳмуддати наваскарӣ дар ин қисми ҳарбӣ роҳандозӣ гардида буд, зимни он командири гурӯҳе аз наваскарон ва сержантони вобастаи ин гурӯҳ дар майдони сафороӣ тарзи додани саломи ҳарбӣ, ҳолати низом истодан дар саф, ҳаракати низомии бесилоҳ ва ҳолати бо силоҳ қабул намудани Савганди ҳарбиро ба ҳар як наваскар амалан нишон дода, онҳоро ба қабули савганди садоқат ба халқу ватан, ки то баргузории ин маъракаи муҳим дар қисми ҳарбӣ рӯзҳое ба шумор мондааст, тайёр мекарданд.
Умуман, таълиму омӯзиши наваскаронро афсарону сарбозони ботаҷриба бар зима доранду кӯшиш менамоянд, ки онҳоро дар рӯҳияи хизмати шоиста ва пос доштани муқаддасоти Ватан тарбия намоянд.
Вобаста ба шароиту имконоти фароҳамбуда ҳаминро бояд зикр намуд, ки имрӯз барои сарбозон чун дигар қисму воҳидҳои ҳарбӣ низ синфхонаҳои таълимӣ, хобгохи замонавӣ, нуқтаи тиббӣ, майдочаи варзишӣ, ошхона ва дигар шароитҳои хизмативу маишӣ фароҳам буда, имкон медиҳад, ки онҳо ниёзҳои маънавӣ ва ҷисмонии худро бо мутолиаи китобҳои гуногуни ҳарбӣ ва маш
ғулиятҳои варзишиву тактикӣ бароварда созанд.
Пас аз итмоми курси якмоҳаи наваскарӣ ва ёд намудани Савганди ҳарбӣ наваскарон бо назардошти ҳунару маҳорат ва донишу таҷрибаашон ба вазифа ва ӯҳдадориҳои муайян вобаста карда мешаванд, ки сарбозонро ба масъулиятшиносӣ водор намуда, онҳоро ба фаъолияти мустақилона дар хизмати бар ӯҳдадошта ва зиндагии ояндаашон омода менамояд.
Б. ШАРИФОВ
