Вобаста ба иҷрои талаботи Фармони Президенти Ҷумҳурии Тоҷикистон “Дар бораи ба эҳтиёт рухсат додани хизматчиёни ҳарбие, ки мӯҳлати муқарраргардидаи хизмати ҳарбиро адо намудаанд ва даъвати навбатии шаҳрвандони солҳои таваллуди 1996-2005-и Ҷумҳурии Тоҷикистон ба хизмати ҳарбӣ”, дар Вазорати мудофиаи мамлакат бо иштироки муовини сарвазири Ҷумҳурии Тоҷикистон-раиси комиссияи даъвати ҷумҳуриявӣ Матлубахон Сатториён ва дигар мақомоти вобастаи ин чорабинии муҳими сиёсӣ, ҷаласаи комиссияи даъвати ҷумҳуриявӣ баргузор гардид.
Дар кори ҷаласа, ки рӯзномаи он масъалаҳои омодагӣ ба даъвати тирамоҳии соли ҷорӣ ва тартиби адои хизмати ҳарбӣ дар ҳайати захираҳои даъвати сафарбариро дар бар мегирифт, масъулин зимни баромади худ пеш аз ҳама натиҷаи даъватҳои пешин ва сатҳу сифати хизмат дар ҳайати захираҳои даъвати сафарбариро мавриди таҳлилу баррасӣ қарор дода, дар самтҳои зикргардида, шахсони масъулро бо супоришҳои мушаххас вазифадор намуданд.
Аз ҷумла, ҷиҳати иҷрои дастуру супоришҳои Роҳбарияти олии мамлакат, талаботи санадҳои меъёрӣ-ҳуқуқии амалкунанда дар соҳаи даъват ва вобаста ба теъдоди умумии захираҳои даъватӣ дар мамлакат таъкид карда шуд, ки дар мавсими навбатии даъват ва муҳлати пешбинигардида ба он, мақомоти вобастагардидаро зарур аст бо масъулияти баланд ва дарки муҳимияти ин чорабинии сиёсӣ-ҷамъиятӣ амал намуда, дар заминаи корҳои анҷомдодашудаи тодаъватӣ ва омӯзиши пешакии даъватшавандагон, ҷавонони рӯҳану ҷисман солим ва аз ҳама лиҳоз оботобёфтаро ба сафи Қувваҳои Мусаллаҳ баҳри хизмат ба халқу Ватан равона намоянд.
Боқӣ ШАРИФЗОДА,
майор
