Чун дигар афсарони сатҳу зинаҳои гуногуни Вазорати мудофиа, ҳайати шахсии Раёсати тиббӣ-ҳарбӣ, госпиталҳои ҳарбии гарнизонҳои ҷумҳурӣ ва масъулини хадамотҳои тиббии қисму воҳидҳои низомии ин ниҳоди қудратии кишвар низ зимни ҳар як давраи омӯзишӣ, яъне дар як сол ду маротиба ба ҷамъомадҳои методӣ-таълимӣ ҷалб карда мешаванд ва дар рафти ин гуна ҷамъомадҳо мавзӯву масъалаҳои мухталифи соҳавиро мавриди омӯзишу баҳрабардорӣ қарор медиҳанд.
Ҷамъомади навбатии табибони низомӣ, ки давоми ду рӯз дар пойгоҳи Госпитали марказии ҳарбии Вазорати мудофиа доир гардид, дар нахустрӯзи он пеш аз ҳама аз ҷониби иштирокчиёни ҷамъомад асосан мавзӯву масъалаҳои силоҳи биологӣ ва намудҳои он, талафоти санитарӣ аз силоҳи биологӣ ва чорабиниҳои зиддиэпидемиологӣ ҳангоми сар задани манбаи эпидемикӣ, қоида ва усулҳои терапияи интенсивӣ мавриди омӯзиш ва таҳлилу баррасӣ қарор гирифт. Ҳамзамон, дар рафти ҷамъомад ба масоили таъминоти ҷузъу том бо маводи доруворӣ ва таҷҳизоти тиббӣ, нигоҳдорӣ ва самаранок истифода бурдани онҳо диққати махсус равона карда шуд.
Қисмати амалии ҷамъомад, ки рӯзи дигари онро дар бар мегирифт, дар аснои он афсарони соҳа ташкил ва гузаронидани чорабиниҳои табобатӣ-профлактикӣ дар шароити бунгоҳи тиббиро бозомӯзӣ намуданд. Барои босифат ва дар сатҳи баланд ташкилу гузаронидани машғулиятҳои амалӣ, дар нуқтаҳои таълимӣ, хаймаҳои саҳроӣ, дастгоҳу таҷҳизоти гуногун ва дигар воситаҳои хизматрасонии тиббӣ фароҳам гардида буд.
Дар ин қисмати машғулиятҳо афсарони хадамотҳои тиббии ҷузъу том роҳҳои расонидани ёрии аввалин ба хизматчиёни ҳарбӣ ҳангоми осеббардорӣ дар фаъолияти ҳамарӯзаи қисмҳои ҳарбӣ, тартиби таҳияи ҳуҷҷатҳои лозима ва интиқоли беморон ба муассисаҳои табобатиро амалан нишон доданд. Ҳамин тавр, табибони ботаҷриба иштирокчиёни ҷамъомадро дар ҳар бахш бо қоидаву талаботи дурусти кӯмаки тиббӣ шинос намуда, марҳилаҳои интиқоли тиббии беморону захмдорон, муайяну мушаххас гардонии дарду захми онҳоро низ ба таври амалӣ фаҳмониданд.
Дар воқеъ, ташкили чунин ҷамъомадҳои омӯзишии соҳавӣ дар шароити гуногуни хизматӣ ва ҳолатҳои эҳтимолӣ ба самаранокии кору фаъолияти тиббии табибони низомӣ дар сафи ҷузъу томи Артиш мусоидат мекунад. Зеро, онҳо дар раванди хизмати рӯзмарра, яъне замони осоишта, ҳолати ҷанг ва умуман дар ҳама гуна вазъият масъулияти ҳифзи саломатии ҳайати шахсиро бар ӯҳда доранд.
Ҳамин тавр, дар қисмати ҷамъбастии ҷамъомад дар баробари музокира ва таҳлили мавзуъҳои ба машғулиятҳо пешбинигардида, роҳу воситаҳои муассири пешгирӣ аз бемориҳои мавсимӣ, ҳамчунин дар охир уҳдадориҳои шахсони вазифадори хадамоти тиббӣ, тарзи ташкили назорати санитарӣ, корҳои табобативу ташхисӣ ва баҳисобгирию ҳисоботи тиббӣ дар қисмҳои ҳарбӣ муҳокимаву баррасӣ гардиданд.
Б. ШАРИФОВ
