Пас аз анҷоми бомуваффақонаи дарсу таълимоти низомии ҳар як давраи таҳсил дар Қувваҳои Мусаллаҳи мамлакат, хизматчиёни ҳарбӣ аз фанҳои дақиқи низомӣ ба таври назариявию амалӣ санҷиш супорида, ҳамчунин ба ҷамъомадҳои гуногуни таълимӣ ва баромадҳои саҳроӣ ҷалб мегарданд.
Тамринҳои сафӣ-тактикӣ, ки дар доираи ҷамъбасти соли хониш, омодагиҳо ба даври навбатии омӯзиш ва бо мақсади санҷиши омодабошии ҷангӣ дар яке аз қисмҳои ҳарбии минтақаи Рашт ташкилу ба роҳ монда шуд, тибқи матлаби пешакии тамринҳо, гурӯҳи тактикии қисми ҳарбиро зарур буд, то роҳу усулҳои нави ҳифз ва мудофиаи шаҳракҳои ҳарбиро амалан роҳандозӣ намоянд.
Аз ин рӯ, бо гирифтани ишора, қабул намудани силоҳу муҳиммоти ҷангӣ ва дигар таҷҳизоту лавозимоти зарурӣ, гурӯҳи такткикии қисми ҳарбӣ дар майдони сафороӣ ҷамъ омода, барои иҷрои ҳама дастуру супоришҳо омодагӣ мегирифтанд.
Ҳамин тавр, бо қабул намудани қарори дахлдор вобаста ба вазъияти эҳтимолӣ ва мавзуъву матлаби ба тамринҳои сафӣ-тактикӣ пешбинигардида, як гурӯҳ афсарону сарбозони қисми ҳарбӣ бо тартиби муқарраргардида амал намуда, ба воситаи техникаҳои ҳарбиву автомобилӣ ва мошинҳои махсуси ба тамринҳои тактикӣ ҷалбгардида ба иҷрои супоришҳои вобасташуда раҳсипор карда шуданд.
Ҳамзамон, қайд кардан ба маврид аст, ки дар давраи таътил, афсарону сарбозони ин қисми ҳарбӣ низ чун дигар низомиёни мамлакат дар баробари ҷалбгардидан ба ҷамъомадҳои амалии таълимӣ ва дар ин замина, сайқал бахшидани донишу маҳорати касбӣ, инчунин тибқи нақшаи алоҳидаи тасдиқгардида ба мусобиқаҳои ҳарбӣ-варзишӣ ва чорабиниҳои фарҳангиву фароғатӣ фаро гирифта мешаванд.
Наваскарон бошанд, тибқи машғулиятҳои таълимии ба онҳо пешбинигардида, ба омӯзиши хусусиятҳои тактикиву ҷангии силоҳу муҳиммоти ҳарбӣ машғул шуда, бо роҳи ба қисмҳои ҷудо ва насб намудани навъҳои силоҳ, аз қабили, милтиқи мергани Драгунов, Пулемёт ва Автомат Калашников, сохт ва қисмҳои таркибии онро аз худ менамоянд.
Дар доираи омодагиҳо ба соли нави таҳсил, ки он аз аввали моҳи январи соли 2022, дар Қувваҳои Мусаллаҳи Ҷумҳурии Тоҷикистон оғоз мегардад, бинову синфхонаҳои таълимӣ, аёнияту таҷҳизоти дарсӣ ва
дигар шароити зарурӣ омода карда шуда, командирон, муовинони онҳо вобаста ба самти фаъолияти худ ва дигар афсарони масъул нақшаву барномаҳои таълимиро коркарду тарҳрезӣ менамоянд.
Ин нукта қобили зикр аст, ки дар заминаи дастгириву ташаббусҳои неку созандаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар давраи омодагиҳо ба ҷашни 30-солагии Истиқлоли давлатӣ ва таҷлил аз солгарди ин санаи муҳими таърихӣ, танҳо дар Вазорати мудофиаи мамлкат ва ҷузъу томи навъҳои қӯшуни Қувваҳои Мусаллаҳ наздики 500 бинову иншооти таъиноташон гуногун сохта ба истифода дода шудааст.
Дар доираи анҷоми корҳои сохтмонӣ ва мавриди баҳрабардорӣ, қарор додани иншооти мухталифи ҷашнӣ дар минтақаи Рашт, як бинои дуошёнаи Раёсати қисми ҳарбии 02011, бо тамоми шароити муосири хизматӣ ва бо тарҳу услуби замонавӣ сохта шудааст. Вобаста ба азнавсозии як қисми ҳарбии зертобеи он бошад, хобгоҳи замонавӣ бо имкониятҳои васеи хизматрасонӣ дар дохили бино ва бо фарогирии дигар утоқҳои кориву хизмати маишӣ, хонаҳои фарҳангиву фароғатӣ ва нигоҳдории силоҳҳои оташфишони ҷангӣ бунёд гардидааст, ки мавриди истифодаи васеи ҳайати шахсӣ қарор дорад.
Ҳамчунин, дар дохили қисми ҳарбӣ ,мувофиқ ба талаботи давру замон, синфхонаҳои таълимӣ, толори маҷлис, китобхона, истгоҳи технкикӣ бо синфхонаҳои тайёрии ронандагӣ, толору майдончаҳои варзишӣ ва
дигар иншооти гуногун сохта, мавриди баҳрабардорӣ қарор дода шудааст. Бинову иншооти зикргардида ва шароити фароҳамбуда дар онҳо имконият медиҳад, ки ҳамаи ҳайати шахсӣ хизмати рӯзмарраи хешро сарбаландона пеш бурда, тамоми машғулиятҳои таълимиву тактикиро дар сатҳи зарурӣ ташкилу роҳандозӣ намоянд ва барои ҳифзу ҳимояи давлати ҷавони Тоҷикистон ва дастовардҳои беанзири 30 соли соҳибистиқлолии он, ҳамеша омода бошанд.
Боқӣ ШАРИФОВ,
майор
