Дар ҷодаи талошҳои ватандӯстона бобати тақвияти маҷмӯи фаъолиятҳои вобаста ба омодагии тодаъватии ҷавонон ба хизмати ҳарбӣ ва дар доираи иҷрои вазифагузории вазири мудофиаи Ҷумҳурии Тоҷикистон генерал-полковник Эмомалӣ Собирзода оид ба ҷоннок намудани тарбияи ҳарбӣ-ватандӯстӣ дар толори Муассисаи давлатии «Мададгори мудофиа» — и Вазорати мудофиа бо ҷалби омӯзгорони «Омодагии ибтидоии ҳарбӣ» ва хонандагони синфҳои болоии муассисаҳои таҳсилоти миёнаи умумии ноҳияи Фирдавсии шаҳри Душанбе чорабинии мақсаднок гузаронида шуд.
Зимни ин чорабинӣ баромадкунандагон дар партави ҳидоятҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон, ки санаи 16 – декабри соли равон дар Паёмашон таъкид намуданд, ҷавононро ба ватандӯстӣ, худшиносию худогоҳӣ ва ҳунаромӯзӣ даъват намуда, муқаддас будани ҳифзи Ватан, садоқат ба арзишҳои ватандорӣ ва пуршараф будани адои қарзи фарзандиро муҳим маънидод намуд.
Иштирокдорони ин чорабинӣ, ки аксарияташонро ҷавонони синни тодаъватӣ ташкил медоданд, дар қисмати дигари ин тадбири ҳарбӣ-ватандӯстӣ аз намоиши лавозимот ва воситаҳои варзишӣ, таҷҳизоту лавозимоти варзишии авиатсионӣ, тирандозӣ, дастгоҳҳои хурди бесарнишин дидан карданд.
Чунин тадбирҳои ҳарбӣ – ватандӯстӣ минбаъд дар тамоми шаҳру ноҳияҳои кишвар аз ҷониби сохторҳои таркибии Муассисаи давлатии «Мададгори мудофиа» — и Вазорати мудофиаи Ҷумҳурии Тоҷикистон бо мақсади тақвияти маҷмӯи тадбирҳои омодагии тодаъватӣ ва тайёр намудани ҷавонон ба хизмати ҳарбӣ гузаронида мешаванд.
