Дар давоми солҳои соҳибстиқлолии кишвар Ташкилоти ҷамъияии мадагори мудофиаи Тоҷикистон дар омода намудани ҷавонони то синни даъватӣ ба хизмати ҳарбӣ ва дар самти иҷрои нақшаи даъват ба сафи Қувваҳои Мусаллаҳи ҷумҳурӣ саҳми арзанда мегузорад.
Мактабҳои муттаҳидаи техникӣ ва автомобилии тобеи Ташкилоти ҷамъиятии мададгори мудофиа, ҳамчун манбаи бо сарбозони соҳибихтисос таъмин намудани ҷузъу томи Қувваҳои Мусаллаҳ то имрӯз ин вазифаи муҳимро сарбаландона иҷро карда истодаанд. Даҳҳо клубҳои авиатсионӣ, варзишӣ-техникӣ, тарандозӣ, мотосиклронӣ, картингронӣ, десантчиёни ҷавон дар тамоми қаламрави ҷумҳурӣ дар ихтиёри наврасону ҷавонон қарор доранд, ки барояшон мактаби мардонагиву ҷасорат гардидааст.
Вазифаҳои асосии тайёр намудани мутахассисон барои Артиши миллӣ ин пеш аз ҳама ташаккулёбии ҷаҳонбинии касбомӯзон, ҳушёрӣ ва зиракӣ, интизомнокӣ, садоқати бепоён ба Ватан, доимо омода будан ба иҷрои ӯҳдадориҳои ҳарбӣ ва тарбия намудани муҳофизони меҳан дар рӯҳияи Ватандӯстиву хештаншиносӣ мебошад.
Мактабҳои муттаҳида, техникӣ ва автомобилии Ташкилоти ҷамъиятии мададгори мудофиа барои тайёр намудани мутахассисон аз ҳисоби ҷавонони аз комиссариатҳои ҳарбии шаҳру ноҳияҳои кишвар роҳхатгирифта махсус гардонида шудаанд.
Айни ҳол, аз ҷониби роҳбарияти ташкилот вазифагузорӣ карда шудааст, ки сифати омодасозии мутахассисон барои эҳтиёҷоти артиш боз ҳам боло бардошта шуда, номгӯйи ихтисосҳо аз рӯйи зарурат ва сафарбарии воқеӣ ба хизмати ҳарбӣ муайян ва зиёд карда шаванд.
Ин аст, ки бо назардошти беҳтар гардидани шароити хизмат дар сафи Қувваҳои Мусаллаҳи мамлакат ва сатҳи баланди таъминоту хизматрасонӣ ба хизматчиёни ҳарбӣ, масъулини Ташкилоти мадагори мудофиаи ҷумҳурӣ як қатор курсҳои таълимӣ, аз ҷумла курси омодакунии ошпазҳоро аз ҳисоби ҷавонони синни даъватӣ ташкилу ба роҳ мондаанд, ки аллакай теъдоди муайяни даъватшавандагон ба курси мазкур ҷалб карда шудаанд.
Машғулиятҳои курси таълимии ошпазҳои ҷавон аз ҷониби мутахассисони соҳа роҳандозӣ гардида, курсомӯзон ба он ба таври назариявӣ ва ҳам амалан ба таълим фаро гирифта шудаанд.
Ҳамин тавр, баъди пурра аз худ кардани барномаи таълимӣ, омӯзиши нозукиҳои хӯроки сарбозӣ, тарз ва усулҳои омода намудани он, ин гурӯҳи ҷавонон бо гирифтани шаҳодатнома ба хизмат дар сафи Қувваҳои Мусаллаҳ раҳсипор гардида, минбаъд ҳамчун ошпаз мӯҳлати муқарраргардидаи хизмати ҳарбиро дар қисму воҳидҳои низомӣ пеш мебаранд.
Воқеан, тайёр намудани мутахассисон барои навъҳои гуногуни қӯшунҳо супориши муҳими давлатӣ буда, он бевосита ба иҷрои нақшаи даъват, баланд бардоштани сатҳи омодагии ҷангии ҷузъу томи низомӣ ва дар ҳамин замина таҳкиму тақвият бахшидани иқтидори мудофиавии мамлакат алоқамандии зич дорад.
Боқӣ ШАРИФОВ
