Боиси хушнудиву сарфарозист, ки дар даврони Истиқлоли давлатӣ нуфузи Артиши миллӣ дар миёни аҳолӣ, ба хусус ҷавонон афзун гашта, мардуми кишвар хизматҳои шабонарӯзии афсарону аскарони Қувваҳои Мусаллаҳи меҳанро қадр мекунанд ва аз муҳофизони ватани хеш ифтихор менамоянд, ки ин албатта амали воқеист. Чунки низомиёни мамлакат ҳанӯз аз рӯзҳои таъсисёбии Артиши миллӣ дар таҳким бахшидани сохти конститутсионӣ дар мамлакат, ҳимояи ҳама дастоварду музаффариятҳои истиқлолият, пойдории сулҳу субот, таъмини ҳаёти осоиштаи мардумони Тоҷикистони азиз ва баланд бардоштани иқтидори мудофиавии кишвар саҳми арзанда гузоштаанд.
Ин аст, ки ҳамасола ба муносибати таҷлил аз рӯзи таъсисёбии Қувваҳои Мусаллаҳи ҷумҳурӣ ва бо мақсади арҷгузорӣ нисбат ба хизматҳои шоёни таҳсини афсарону сарбозон, хизматчиёни ҳарбии сатҳу зинаҳои гуногун ва дар маҷмӯъ муҳофизони ин марзу бум, дар қаламрави мамлакат, чорабиниҳои гуногуни сиёсиву низомӣ, фарҳангиву фароғатӣ ва варзишӣ ба нақша гирифта шуда, он дар сатҳи баланд баргузор карда мешаванд.
Дар ин замина ҳайатҳои роҳбариву фармондеҳии Вазорати мудофиаи мамлакат низ имрӯзҳо дар баробари таҳия ва татбиқи амалии нақша-чорабиниҳо, ҷиҳати дар навбати аввал иҷро намудани тамоми дастуру супоришҳои Пешвои миллат, муҳтарам Эмомалӣ Раҳмон, инчунин баҳри таҷлил аз ҷашни муҳофизони Ватан омодагии ҳамаҷониба мебинанд.
Дар доираи нақша-чорабиниҳо, ки аллакай аз нимаи дуюми моҳи январи соли 2024 тасдиқ гардидааст, масъулини Вазорати мудофиаи мамлакат азм доранд, ки ба муносибати истиқболи сазовор аз ҷашни Артиши миллӣ, як қатор чорабиниҳои муҳими сиёсиву фарҳангӣ, варзишӣ ва таблиғотиро ташкилу роҳандозӣ намоянд.
Аз ҷумла, маҷлиси тантанавӣ, маросими гулчамбаргузорӣ дар назди муҷассамаи “Шоҳ Исмоили Сомонӣ” ва Оромгоҳи сарбози номаълум, ташкили конфронсҳои илмӣ-амалии сатҳи ҷумҳуриявӣ, бо ҷалби ҳунармандони хушсалиқаи мамлакат, таҳия ва пешниҳоди консерти бошукӯҳи ҷашнӣ, озмунҳои фарҳангиву фароғатӣ, дар боғҳои ҳудуди пойтахт ташкил намудани барномаҳои тарбияи ҳарбӣ-ватандӯстӣ, дар муассисаҳои таълимии ҳарбӣ баргузор кардани дарсҳои кушод доир ба нақши Қувваҳои Мусаллаҳ дар таъмини мудофиаи давлат, оид ба дастовардҳои Артиши миллӣ дар даврони соҳибистиқлолии мамлакат, барои хизматҳои арзандаву бенуқсон дар сафи артиш, бо медалу ифтихорномаҳо қадрдонӣ намудани хизматчиёнӣ ҳарбӣ, тақдими рутбаҳои навбатии ҳарбӣ, мусобиқаҳои ҳарбӣ-варзишӣ, расонидани кӯмаки моддӣ ба ятимон дар сохторҳои зертобеи Вазорати мудофиаи ҷумҳурӣ, аёдати собиқадорони Қувваҳои Мусаллаҳ, дастгирӣ намудани узви оилаҳои хизматчиёни ҳарбии фавтида, арҷгузорӣ нисбат ба афсарону сарбозони ҳалокгашта ва даҳҳо чорабиниҳои дигарро то рўзи ҷашн доир намоянд.
Илова бар ин, дар баробари ташкилу баргузории чорабиниҳои фарҳангӣ-фароғатӣ ва варзишӣ, масъулин тасмим гирифтаанд, ки то санаи 23-юми феврал ба муносибати истиқболи сазовор аз 31- солагии таъсисёбии Қувваҳои Мусаллаҳ дар ҳудуди ҳама гарнизонҳои ҷумҳурӣ як қатор бинову иншооти аҳамияти ҳарбӣ доштаро низ мавриди баҳрабардорӣ қарор диҳанд.
Фаридун МАҲМАДАЛИЗОДА,
сардори Маркази матбуоти
Вазорати мудофиаи
Чумҳурии Тоҷикистон,
полковник
