Чун солҳои қаблӣ низ сафи довталабоне, ки хоҳиши таҳсил дар Донишкадаи ҳарбии Вазорати мудофиа ва дигар муассисаҳои олии ҳарбии дохил ва хориҷи кишварро доштанд, соли равон хело зиёд буданд. Тибқи иттилои масъулини Раёсати кадрҳо ва таълимоти ҳарбии Вазорати мудофиа дар раванди қабул ҷавонони зиёд аз ҳисоби хатмкунандагони солҳои таҳсили 2023-2024 баҳри шомил шудан ва идома додани таҳсили низомӣ ба комиссияи қабули Донишкадаи ҳарбӣ ва Литсейи ҳарбии ин ниҳоди қудратии кишвар муроҷиат мекарданд, ки бо тартиби муайянгардида ҳамаи онҳо аз комиссияи тиббӣ гузаронида шуданд ва нафарони солиму бардам барои супоридани имтиҳонҳои дохилшавӣ роҳхат гирифтанд. Ҳамин тавр, пас аз муоинаи дақиқи тиббӣ ва супоридани имтиҳонҳо нафарони қобил ба хизмати ҳарбӣ ба курси якуми муассисаҳои таълимии ҳарбии зикргардида шомил шуданд.
Наздики як моҳ аст, ки онҳо ба омӯзиши курси тайёрии ҷанговари ҷавон машғул мебошанд ва пас аз анҷоми ин машғулиятҳо курсантон баҳри садоқат ба халқу Ватан Савганди ҳарбӣ ёд намуда, шурӯъ аз якуми сентябр ба дарсу таълимоти низомӣ фаро гирифта мешаванд.
Маврид ба зикр аст, ки барномаи таълимии курси ҷанговари ҷавон аз рӯйи барномаи таҳсилот ва нақшаи таълимӣ аз ҷониби Вазорати маориф ва илми Ҷумҳурии Тоҷикистон ва барномаву дастурамалҳои методӣ-таълимии Донишкадаи ҳарбии Вазорати мудофиа, оинномаҳои ҳарбии Қувваҳои Мусаллаҳи Ҷумҳурии Тоҷикистон ва дигар санадҳои меъёрӣ-ҳуқуқӣ коркард ва таҳия шудааст. Ҳисоби машғулиятҳои таълимӣ дар як рӯз 8 соатро ташкил медиҳад, ки мақсад аз роҳандозӣ намудани он, пеш аз ҳама пурра намудани сатҳи дониши курсантони курси якум доир ба фанҳои ихтисосӣ, баланд бардоштани маҳорати фармондеҳӣ-методӣ, малакаи корҳои тарбиявӣ ва тарбияи ҷисмонии ҳайати шахсии курсантон мебошад.
Ҳамарӯза соатҳои омӯзишии барнома аз рӯйи фанҳои таълимии тактикӣ, тайёрии оташфишонӣ, тайёрии ҳарбӣ-муҳандисӣ, оинномаҳои ҳарбӣ ва тайёрии сафороӣ ҷараён дорад, ки дар маҷмӯъ курсантони соли аввал бо сатҳу сифати баланд ба таълиму омӯзиши барномаҳои курси тайёрии ҷанговари ҷавон фаро гирифта шудаанд.
Мавзӯъ ва мундариҷаи машғулиятҳо дар соатҳо ва рӯзҳои аввали таълимоти низомӣ пурра ба соҳаи ҳарбӣ бахшида шудааст, то ки донишандӯзон ё худ афсарони оянда дар нахустрӯзи таҳсил бо аҳди ҷавонмардона ва нерӯйи шикастнопазир барои мудофиаи Ватан ва ҳимояи мардуми ин сарзамин омодагӣ гиранд.
Аз ҷумла, дар машғулиятҳои омодагии сафороӣ курсантон бо омӯзиши назариявии муқаррароти умумии Оинномаи сафороии Қувваҳои Мусаллаҳи Ҷумҳуриии Тоҷикистон, инчунин дар соати амалии машғулиятҳо мавзуъҳои вобаста ба вазифаҳои командирон ва сарбозон пеш аз сафороӣ ва дар саф, ҳолати сафист, гардиш дар ҷои ист, гардишҳо ҳангоми ҳаракат, додани саломи ҳарбӣ, баромадан аз саф ва баргаштан ба сафро меомӯхтанд.
Машқи саф, ҳаракати бе силоҳ ва қадамзании сафӣ дар ҳайати взвод низ идомаи ҳамин машғулиятҳо буд, ки онро курсантон бо камтарин хатоҳо иҷро мекарданд ва ҳамзамон барои қабули Савганди ҳарбӣ омодагӣ мегирифтанд.
Машқҳои тирпарронии курси тайёрии ҷанговари ҷавон дар пойгоҳи таълимии Донишкадаи ҳарбӣ бо расонидани қоидаҳои бахатарӣ ҳангоми тирпарронӣ ва истифода аз аслиҳаи ҷангӣ оғоз гардид. Афсари масъули соҳа ба донишандӯзон мушаххасан доир ба сохт ва хислатҳои тактикиву ҷангии автомат ва пулемёт Калашников, милтиқи мергании Драгунов ва норианҷакандози дастии зиддитанкӣ маълумот дода, ҳамзамон ҳолатҳои истифода ва тарзи тирпарронӣ аз ин навъ силоҳҳои ҷангиро низ нишон дод.
Дар раванди ин машғулиятҳо тарзи ба бар намудани либсҳои низомӣ, дигар таҷҳизоти муҳофизатии шахс ва зарурияту аҳамияти истифодабарии онҳо ба таври кофӣ фаҳмонида шуд, то ки донишандӯзон дар замони таҳсил ва дар оянда зимни хизмат дар сафи Қувваҳои Мусаллаҳ дар иҷрои вазифаҳои хизматӣ бомасъулияту серталош бошанд.
Мавзӯъҳои дарсии чаҳор оинномаи Қувваҳои Мусаллаҳ, ки албатта дар рафти курси кӯтоҳмуддати ҷанговари ҷавон муқаррароти умумии онҳо омӯзонида мешавад, дар синфхонаҳои таълимӣ доир карда шуда, шакли пурраи таълимоти он дар раванди таҳсили курсантон роҳандозӣ карда мешавад. Зеро, оинномаҳои умумиҳарбии Қувваҳои Мусаллаҳ тамоми самтҳои хизмати ҳарбиро ба танзим дароварда, метавонанд дар фаолияти низомӣ ва рафти хизмати ҳар як афсару сарбоз дастурамали асосии методӣ-таълимӣ бошанд.
Ҳамин тавр, бо омӯзиши сатҳи баланди барномаи таълимӣ дар заминаи шароити хубу мусоиде, ки дар Донишкадаи ҳарбии Вазорати мудофиа тайи солҳои соҳибистиқлолӣ бо заҳмату талошҳои Сарфармондеҳи Олии Қувваҳои Мусаллаҳ генерали ратиш муҳтарам Эмомалӣ Раҳмон фароҳам оварда шудааст, курсантони ҷавон бо азму иродаи ватандӯстона қавл доданд, ки бо дониши хубу аъло ва интизоми намунавӣ таҳсил намуда, дар оянда ба халқу Ватан содиқона хизмат менамоянд.
Боқӣ ШАРИФӢ,
подполковник
