Масъулини Вазорати мудофиа бо мақсади таъмин намудани бехатарӣ аз сӯхтор дар тамоми иншооти зертобеи худ ва қисму воҳидҳои ҳарбӣ нақша чорабиниҳои гуногуни зиддисухторро амалӣ менамоянд. Ин навбат бошад бо иштироки дастаи Сарраёсати хадамоти давлатии оташнишонии Вазорати корҳои дохилӣ, бо ҷалби дастаи сӯхторхомушкунии Вазорати мудофиа ва ҳайати шахсии Шӯъбаи истифодабарии иншоот ва бехатарии зиддисӯхтори Раёсати истифодабарии манзилии ин ниҳоди қудратии кишвар машғулиятҳои амалӣ вобаста ба пешгирӣ аз сар задани сӯхтор дар пойгоҳи яке аз иншооти муҳими хизматрасонӣ дар самти ақибгоҳӣ доир карда шуд.
Қабл аз оғози машғулиятҳои амалии сӯхторнишонӣ, масъулини соҳа сараввал дар синфхонаҳои таълимии тобистона бо ҷалби дастаи оташхомӯшкунии яке аз қисмҳои ҳарбӣ дарсҳои назариявӣ доир намуда, мавзўъҳои марбут ба ин самт, аз ҷумла роҳҳои ҳимояи худ аз оташ ва дигар моддаҳои тарканда, пешгирӣ аз сӯхтор ва бартарафсозии оқибатҳои нохуши онро мавриди омўзишу баҳрабардорӣ қарор доданд.
Сипас, бо қабули ишора доир ба сар задани сӯхтор дар анборҳои ақибгоҳӣ, ҳайати сӯхторхомушкунонӣ бо таҷҳизоти махсуси техникӣ барои таъмини бехатарӣ аз сӯхтор, инчунин бо лавозимоти оташнишониву маводи муҳофизатӣ аз оташ ба ҷойи ҳодисаи шартии сӯхтор ҳозир шуданд. Онҳо бо истифода аз имкониятҳои мавҷуда омодагии доимии худро нишон доданд.
Тибқи нақша ин гуна машғулиятҳо пайваста доир карда шуда гурӯҳи сарбозон аллакай талаботи меъёру стандартҳо, қоидаву дастурҳо оид ба таъмини бехатарӣ аз сӯхторро аз худ намудаанд. Ва метавонанд вазифаву ӯҳдадориҳои хешро дар самти чораҳои аввалияи зиддисӯхтор, дар шароити бехатар нигоҳ доштани бинову иншоот ва воситаҳои маҳдуд сохтани паҳншавии оташро дар сатҳи зарури ташкил намоянд.
Тибқи иттилои масъулин онҳо нақша доранд, ки чунин чорабиниҳои фаҳмондадихиву омӯзиширо дар дигар бинову иншооти ҷузъу том ва қисму воҳидҳои ҳарбии Вазорати мудофиа ташкилу ба роҳ монанд.
Боқӣ ШАРИФОВ
