Дар асоси фармоиши вазири мудофиаи Ҷумҳурии Тоҷикистон бахшида ба 32-юмин солгарди таъсисёбии Қувваҳои Мусаллаҳ ва бо мақсади кашфу дарёфти истеъдодҳои ҷавон, нафарони болаёқату ҳунарманд аз миёни сарбозон, шурӯъ аз аввали моҳи феврали соли равон дар гарнизонҳои Хоруғ, Суғд, Хатлон, минтақаи Рашт ва шаҳри Душанбе озмуни “Суруди сарбоз” аз номитсияҳои “Беҳтарин рӯзномаҳо ва суратрӯзномаҳои деворӣ”, “Беҳтарин дастаҳои ҳаваскор” ва “Беҳтарин сурудҳои ҳарбӣ” оғоз гардида, он дар сатҳи баланд ҷараён дорад.
Бояд тазаккур дод, ки яке аз ҳадафҳои баргузории чунин чорабиниҳои фарҳангиву фароғатӣ байни ҷузъу том ин тарғиби хизмати ҳарбӣ, тарбияи ватандӯстӣ, баланд бардоштани эҳсоси меҳанпарастии хизматчиёни ҳарбӣ ва тавре ишора намудем, дарёфти чеҳраҳои навро дар бар мегирад.
Ин аст, ки дастаҳои ҳаваскори қисму воҳидҳои низомии ба озмун ҷалбгардида маҳорату малакаи хуби санъаткорӣ, рақсу сурудхонӣ, маҳорати нотиқӣ, ба намоиш гузоштани рӯзномаҳои деворӣ ва қироат намудани суруду шеърҳои ватандӯстона нишон дода, ҳамзамон дар рафти озмун аз уҳдаи навохтани асбобҳои мусиқии мардумӣ низ ба хубӣ баромаданд. Мазмуну мундариҷаи хори умумӣ, хониши бадеӣ ва суруди яккаи иштирокчиёни озмун дар рӯҳияи ватандӯстӣ, садоқат ба ин марзу бум ва аз Савганди ҳарбӣ иборат аст.
Таҳлилҳо нишон медиҳанд, ки маҳз дар доираи баргузории чунин озмунҳо чеҳраҳои нав рӯйи саҳна меоянду муваффақ мешаванд ва ҳамин аст, ки таваҷҷуҳи давлату Ҳукумат нисбат ба баргузории озмунҳои гуногун хуб равона гаридааст
Дар хабару гузоришҳои минбаъда доир ба натиҷаҳои озмун маълумоти муфассал хоҳем дод.
Шоҳин ШАРИФОВ
