Имрўз дар яке аз қисмҳои ҳарбии Вазорати мудофиаи Ҷумҳурии Тоҷикистон, бахшида ба Рўзи таъсисёбии Қувваҳои Мусаллаҳ ва бо мақсади дарёфти истеъдодҳо байни сарбозон, бо ҷалби қисмҳои ҳарбӣ, ҷузъу томҳо ва муассисаҳои таълимии Вазорати мудофиа фестивал-озмуни «Суруди сарбоз» оғоз гардид.Чорабинии мазкурро муовини вазири мудофиа, генерал-майор Абдусаттор Шоҳиён ҳусни оғоз бахшида, зикр намуд, ки чунин чорабиниҳои фарҳангиву фароғатӣ ҳамасола байни қисмҳои ҳарбӣ бо мақсади дарёфти истеъдодҳо, тарғиби хизмати ҳарбӣ ва тарбияи ватандўстии хизматчиёни ҳарбӣ гузаронида мешавад.
Аз ҷониби дастаҳои ҳаваскори қисму воҳидҳои низомӣ маҳорату малакаи хуби санъаткорӣ, рақсу сурудхонӣ, нотиқӣ, ба намоиш гузоштани рўзномаҳои деворӣ, қироат намудани шеъру сурудҳои ватандўстона ва ғайра намоиш дода шуд ва ҳамзамон сарбозон аз иҷрои навохтани асбобҳои мусиқии мардумӣ ба хубӣ баромаданд. Мазмуну мундариҷаи хори умумӣ, хониши бадеӣ ва суруди яккаи иштирокчиёни озмун дар руҳияи ватандўстӣ, садоқат ба Ватан ва аз Савганди ҳарбӣ иборат мебошад. Беҳтарин шеърҳо дар васфи модар ва Тоҷикистони азиз шунида шуданд. Саҳначаҳои ҳаҷвӣ низ ба фаъолияти афсарону сарбозони қисмҳои ҳарбӣ алоқамандӣ доштанд. Мазмуну мундариҷаи рўзнома ва суратрўзномаҳои деворие, ки дар озмун пешниҳод шуда буданд, ба ҳаёту фаъолияти қисмҳои ҳарбӣ, ҷуъзу томҳо ва муассисаҳои Вазорати мудофиа алоқаманд буданд.
Тавре ишора шуд, тибқи нақшаю чорабиниҳои Вазорати мудофиа, қабл аз таҷлили 29-умин солгарди Артиши миллӣ дар байни қисмҳои ҳарбӣ ва ҷузъу томҳои гарнизонҳои Душанбе ва Хатлон фестивал-озмуни «Суруди сарбоз» баргузор мегардад. Бояд зикр намуд, ки аъзои ҳакамон доир ба ҳунару истеъдоди дастаҳо баҳогузорӣ намуданд, ки пас аз ҷамъбасти он доир ба ишғоли ҷойҳо маълумоти муфассал хоҳем дод.
Азимҷон БАДАЛПУР
